Dımashtyń elordadaǵy kontserti úshin 150 sahnalyq kıim tigildi

NUR-SULTAN. QazAqparat - 29 maýsymda Nur-Sultan qalasynda Dımash Qudaıbergenniń «Arnaý» atty jeke kontserti ótedi. Kontserttiń daıyndyǵyna 500-den astam joǵary kásibı maman tartyldy. Keshke 1200 metr matadan 150 sahnalyq kostıým tigildi, dep habarlaıdy QazAqparat «Qazaqstan» RTRK» AQ baspasóz qyzmetine silteme jasap.

Joǵary deńgeıdegi qoıylymdyq nómirler úshin balet trýppasyna halyqaralyq alańdarda óner kórsetip júrgen elimizdiń eń úzdik bıshileri men akrobattary tartyldy. Onyń ishinde, «Notre dame de Paris» mıýzıkliniń ártisteri, «Tantsy na TNT» jobasynyń qatysýshylary jáne batýttyq gımnastıka boıynsha sport sheberleri bar.

«Kontsertke daıyndyq merziminde áýede jalpy qashyqtyǵy 150 myń shaqyrymdy quraıtyn 50 reıs jasaldy. «Arnaý» kontserti úshin 200 kVt daýys, 600 sharshy metr led-ekran, 1000 jaryq qurylǵysy qoldanylady», - dep atap ótti «Qazaqstan» RTRK» AQ Kommertsııalyq dırektory Jannur Aıdarbekova.

Sondaı-aq, 29 maýsym kúni kontsert aldynda, saǵat 19:35-te «Qazaqstan» Ulttyq arnasy tikeleı qosylymǵa shyǵatynyn jetkizdi. Al, kontserttiń telenusqasy 6 shildede kórsetiledi.

QR Prezıdentiniń keńesshisi Erlan Qarın «Arnaý» keshi - mýzykalyq áserge negizdelgen jandy kórinis, tiri dybys, erekshe sahnalyq qoıylym ekenin atap ótti. Kontsert stsenarııine 27 án engizilgen, sondaı-aq, jańa albomyna engen tańdaýly 5 áni bar.

Kontsert uıymdastyrýshylarynyń aıtýynsha, kesh bıletterin álemniń 64 elinen 10 myńǵa jýyq tyńdarman satyp alǵan. Onyń ishinde AQSh, Ulybrıtanııa, Brazılııa, Meksıka, Kanada, Avstralııa, Shveıtsarııa, Malaızııa, Sıngapýr, Afrıka, Egıpet, Izraıl jáne Marokko syndy alys memleketterdiń tyńdarmandary bar.

Sharanyń álemdik mańyzyn eskere otyryp, jobaǵa qazaqstandyq iri - Air Astana, Forte Bank, Kcell kompanııalary qoldaý bildirdi.