Dımashtyń Astanadaǵy kontserti sheteldik telearnalardan kórsetiledi
Eske sala ketsek, Dımash Qudaıbergen AQSh-taǵy tanymal ınternet alańdardyń biri - Ranker-degi «The Best Singers of All Time» (Dáýirdiń uly ánshileri) daýys jınaý saıysyna qatysqanyn buǵan deıin habarlaǵan bolatynbyz. Ánshi atalmysh reıtıngte áý basta ekinshi orynǵa deıin kóterilgenimen, keıin júzdikten shyǵyp qalǵan edi.
OKQ-da ótken baspasóz máslıhatynda Dımashqa atalmysh ınternet-saýalnamaǵa qatysty suraq qoıyldy.
«Sózdiń shyny kerek, ınternettegi daýys berý baıqaýyn oqyrmandarymnan estip bildim. Óıtkeni, men ol kezde shetelde júrdim. Qyzý talqyǵa túsip jatqan ne daýys berý dep qarap edim, ishinde meni Maıkl Djekson, Freddı Merkıýrı sekildi álemdik juldyzdarmen qatar qoıypty. Bir jaǵynan, bul jaǵdaı meni óte erekshe sezimge bóledi. Ondaı kisilermen deńgeıles bolý úshin áli kóp ter tógip, aıanbaı eńbek etýim kerek. Osy oraıda daýys berý kezinde qoldaǵan jerlesterime, sheteldegi tyńdarmandaryma shyn júrekten alǵys aıtamyn. Biraq, ol eshqandaı baıqaý nemese joba emes, ınternet júıesindegi kishigirim saýalnama ǵana bolatyn. Sizderdiń maǵan degen mahabbattaryńyz ben nıetterińiz osyndaıda kórindi. Úmitterińizdi aqtaý úshin barymdy salyp, janymdy salyp, talmaı, tynbaı eńbek ete beremin», - dedi Dımash Qudaıbergen.
Baspasóz máslıhaty barysynda «Qazaqstan» RTRK AQ tóraǵasy Erlan Qarın Astanada ótetin Dımashtyń kontsertine sheteldik telearnalar qazirdiń ózinde qyzyǵýshylyq tanytyp otyrǵanyn tilge tıek etti.
«Sheteldik telearnalar men teleradıokorporatsııalar ártúrli suraýlar joldap jatyr. Astanada ótetin osynaý kontsert birneshe sheteldik telearna arqyly taralady. Sol sebepti, aýdıtorııa úlken. Uıymdastyrý jumysyn keń aýqymda júrgizgeli otyrmyz. Óz elinde, óz alańynda, myńdaǵan fanattarynyń aldynda ótetin Dımashtyń kontsertine oraı qoldaýlaryńyzdy suraımyz», - dedi Erlan Qarın.
Eske sala ketsek, búgin OKQ-da ótken baspasóz máslıhatynda Dımash Qudaıbergen Jastar jyly aıasynda Astanada kontsert beretinin aıtqan bolatyn.