Dımashtyń anasy Abaıdyń ánin shyrqap, halyqty súısindirdi

AQTÓBE. QazAqparat – Aqtóbede ánshi Dımash Qudaıbergenniń anasy Svetlana Aıtbaeva Abaıdyń 175 jyldyǵyna arnalǵan tanymdyq keshte án shyrqap, jınalǵandarǵa erekshe kóńil-kúı syılady, dep habrlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń oblystyq departamenti jáne «Aqtóbe – adaldyq alańy» jobalyq keńsesi Abaıdyń 175 jyldyǵyn merekeleý sheńberinde kolledj stýdentterimen kezdesti. Sharaǵa departament basshysy Mırlan Muhambetov, departament basshysynyń birinshi orynbasary Ǵalymbek Dosanov, departament janynan qurylǵan aqparattyq- aǵartý shtabynyń múshesi, tanymal ánshi Svetlana Aıtbaeva qatysty.

«Tanymdyq keshtiń basty maqsaty – uly aqynnyń ónegeli ómirimen tanystyryp, óleńderi, ánderi arqyly adamgershilik qasıetterge tárbıeleý. Jastardy Abaı shyǵarmalaryn taldaı otyryp ımandylyqqa, asyl qasıetterge baýlý jáne týǵan jerdiń tarıhy men tiliniń qadir-qasıetin uǵyndyrý, óskeleń urpaq pen aǵa býyn arasynda saýatty urpaqtar sabaqtastyǵyn qalyptastyrý.

Shara barysynda departament basshysy Mırlan Muhambetov Abaıdyń qara sózderin oqyp berdi. Al Aqtóbe kólik, kommýnıkatsııa jáne jańa tehnologııa kolledjiniń jas aqyndary Maqsat Іdirisov jáne Gúlim Tilepbergenova Abaıǵa arnap jazǵan ólenderin tartý etti. Sonymen qatar keshtiń qurmetti qonaǵy, birtýar ánshi Dımash Qudaıbergenniń anasy Svetlana Aıtbaeva ǵulama aqynnyń «Jelsiz túnde jaryq-aı» ánin qatysýshylarmen birge shyrqady», - dep habarlady «Aqtóbe – adaldyq alańy» jobalyq keńsesiniń baspasóz qyzmetinen.