Dımashtyń Gonkongtegi kontsertine álemniń ár túkpirinen jankúıerler jınaldy
Mereke ataýly kúnge arnalǵan – osydan jeti jyl buryn 22 jastaǵy qazaqstandyq mýzykant «I am a Singer» jobasyna qatysý úshin alǵash ret Aspan asty eline kelgen bolatyn. Jas ánshi baıqaýdyń alǵashqy týrynda-aq mıllıardtaǵan kórermendi baǵyndyryp qana qoımaı, jobanyń sońyna deıin sátti jetti, kún saıyn jankúıerler aýdıtorııasy da keńeıdi. Olardy júrekke jaqyn adamdar retinde – Dears dep atady.
Sodan beri 7 jyl ótti, ártúrli elder men kontınentterde Dımashtyń jankúıerleri kóbeıdi.
Jańa – 2024 jyl qarsańynda ártis 7 jyl buryn óziniń shyǵarmashylyq jolyna jańa lep bergen jerge qaıta oraldy. Gonkong Kórme ortalyǵyna Qytaıdyń, Eýropanyń, Amerıkanyń, Azııanyń jáne Afrıkanyń túrli qalalarynan Dears jınaldy. 2022 jyldyń qyrkúıeginde Almatydan bastalǵan «Stranger» atty álemdik shoý-týrnesi osy keshte de erekshe ótti.
Dımash Qudaıbergen kontsertti «Golden» ánimen ashty. Keıin keshtiń alǵashqy tosynsyıy – «Smoke» jańa kompozıtsııasy shyrqaldy.
Shoýdyń ekinshi bólimi «Ave Maria» vokalızi jáne Dears premerasyn asyǵa kútken «When I’ve Got You» jańa ánimen jalǵasty.
Dımash 10 jyl buryn jazǵan «Umytylmas kún» áni Sanjaı Álmishevtiń sybyzǵyda súıemeldeýimen usynyldy.
Qazaqstandyq ánshiniń kóptegen úlken kontsertterinde juldyzdar arnaıy qonaq retinde óner kórsetedi, osy kúni de dástúr saqtaldy. Qazaqstandyq ónerpazdy qoldaýǵa Dımash «I am a Singer» jobasyna qatysqannan beri tanıtyn tanymal mýzykant, ánshi, kompozıtor jáne prodıýser Djastın Lo keldi. Djastınniń jeke oryndaýynan keıin ekeýi qytaı tilinde «愛是永恆»/»Mahabbat máńgilik» ánin oryndady.
Kontserttiń bir blogy aspaptyq nómirlerden bastaldy. Aldymen Temirlan Oljabaev pen Ernat Naýryz dombyrada, Ábilmansur Qudaıbergen gıtarada zalǵa erekshe atmosfera syılady. Odan ári Dımash Ábilmansurdyń «Together» avtorlyq ánin oryndady. Bul týyndy álemdik charttarda birneshe ret júldeli oryndarǵa ıe bolǵan edi.
Keshtiń sońǵy blogy reseılik kompozıtor Igor Krýtoıdyń «Stranger» kompozıtsııasymen ashyldy.
D.Qudaıbergen óziniń dostarymen birge halyq aspaptarynyń dybystalýyna zamanaýı mýzykalyq ádisterdiń úılesim múmkindigin pash etip, «Adaı» kúıi men «Dúrdaraz» halyq ánin oryndap berdi.
Kontserttiń fınalynda barlyq jankúıerdiń júreginin oryn tapqan mýzykalyq shyǵarma – «Autumn strong» shyrqaldy.
«Dears… Biz bir–birimizdi kópten beri kórmedik, men sizderdi sahna ústinen úlken, tatý otbasy ekenderińizdi kórip turmyn. Qoldaýlaryńyz úshin raqmet. Sizder bolmasańyzdar men eshteńege qol jetkize almas edim, barlyǵy sizderdiń qoldaýyńyzdyń arqasynda. Kelesi kezdesýdi taǵattana kútemin», – dep Dımash jankúıerlerine shyn júrekten alǵys aıtyp, kontsertti aıaqtady.
Foto: dimashnews.com