Dımash jumys istep júrip, tynyǵatyn adam – Sveta Aıtbaeva

AQTÓBE. QazAqparat - Dımash Qudaıbergenniń Londondaǵy kontsertine qatysqan otbasy men aqtóbelik oqýshy Narǵyz Januzaqova elge oraldy. Sveta Aıtbaeva kontsertten keıingi Dımashtyń kóńil-kúıi men onyń aldaǵy josparlary jóninde aıtyp berdi, dep habarlaıdy QazAqparat tilshisi.

Aqtóbelikter Dımash Qudaıbergenniń otbasy men kontsertte án shyrqaǵan Narǵyz Januzaqovany kútip aldy. Buǵan deıin habarlaǵanymyzdaı, aqtóbelik oqýshy Londonda «Elimniń júregi - Astana» ánin oryndap, Dımash Qudaıbergenniń alǵysyn aldy. 

«Kontsert keremet ótti. Dımash aǵanyń kontsertinde, Indigo at the O2 kontsert zalynda án shyrqap, umytylmas áser aldym. Men úshin bul - úlken mártebe. Ári sapar kezinde Londondy aralap, qaıyqpen júzip, ІІ Elızaveta patshaıymnyń úıin kórý baqyty buıyrdy. Qala tumandy, jaýyndy bolǵanymen, adamǵa jylylyq syılaıdy», - deıdi jas talant Narǵyz Januzaqova.

Aıta keteıik, aqtóbelik oqýshy «Baqytty bala» vokaldyq baıqaýynda jeńimpaz atanyp, ánshi Dımash Qudaıbergenniń kontsertinde birge án shyrqaý múmkindigine ıe bolǵan edi. Sveta Aıtbaeva bul Aqtóbede bastalyp, London sahnasynda jalǵasqan erekshe shara ekenin atap ótti.

«Dımash 2 - 2,5 saǵattyq kontsertti ózi beretin. Bul joly Narǵyz birge án aıtyp, kórermenin tánti etti. Týǵan jeri Aqtóbeden jas daryn barǵanda fanattary da jaqsy qabyldady. Jankúıerler Narǵyzdy óz elderine shaqyrdy», - dedi Sveta Aıtbaeva.

Ánshi Dımash Qudaıbergen VVS kanalyna suhbat berip, Máskeýge, keıin Qytaıǵa barady. Kestesi tyǵyz bolǵan soń ol týǵan jerine kele almaǵan.

«Dımash Londonda qaldy. Ol taıaýda týǵan jerine, Aqtóbege kelip, tynyǵýdy armandaıdy. Biraq kestesi tyǵyz. Londonnan soń Máskeýde óner kórsetip, Qytaıǵa barady. Osy aralyqta ýaqyt taýyp, úıine kelip, demalady dep úmittenemiz. Dımash jumys istep júrip, tynyǵatyn adam. Kishkentaıynan eńbekqor. Mýzykalyq mektep, kolledjge bardy, únemi daıyndyqta júrdi. Stýdııada jańa án jazý, árleý, týyndylardy ómirge ákelý, orkestrmen jumys isteý oǵan kúsh syılaıdy. Jas kezinde tynymsyz jumys istegeni durys dep esepteımiz. Fanattaryna aıtarym, Dımash jaqsy, ol sharshamady», - dedi Sveta Aıtbaeva.