Dımash, Shavhat, Mbappe: Atyraýlyq sýretshi tanymal tulǵalardyń portretin salady

ATYRAÝ. QazAqparat – Atyraýlyq sýretshi álemge tanymal Dımash Qudaıbergen, Shavhat Rahmonov, Kılıan Mbappe sekildi jastardyń portretin salyp júr, dep habarlaıdy QazAqparat tilshisi.

Jas sýretshi Isataı Maıemerov Mahambet aýdanynyń Jalǵansaı aýylynda turady. Otbasyndaǵy bes balanyń biri 2014 jyly Mańǵystaý oblysyndaǵy óner kolledjin sýretshi, keıin M.Ótemisov atyndaǵy Batys Qazaqstan ýnıversıtetin «Beıneleý óneri jáne syzý» mamandyǵy boıynsha bitirgen.

Qazir ózi turatyn aýyldaǵy «Shalqyma» mádenıet úıinde sýretshi bolyp jumys isteıdi. Aýyl balalary úshin sýret úıirmesin ashqan. Onda 12 bala dáris alady.

«Sýret salýǵa qyzyǵýshylyǵym balabaqshada bastalǵan edi. Mektepte túrli sýret baıqaýyna qatystym. Men mamandyq tańdaýda qatelesken joqpyn. Óıtkeni, júregim osy mamandyqty qalady. Ataqty sýretshi Pablo Pıkassonyń «Sýretshi kórgenin emes, sezingenin beıneleıdi» degeni bar. Men de júrekpen sezingenimdi aq qaǵazǵa túsiremin. Sýret salǵan kezimde demalamyn», - deıdi Isataı Maıemerov.

Ol aýdandaǵy mekemelerdiń, balabaqshalardyń qabyrǵasyn bezendiredi. Álemge tanymal tulǵalardyń, ásirese jastardyń portretin beınelegendi unatady. Onyń kollektsııasynda qazaqstandyq ánshi Dımash Qudaıbergenniń, jekpe-jek sheberi Shavhat Rahmonovtyń, frantsýz fýtbolshysy Kılıan Mbappeniń portreti bar.

Sondaı-aq tabıǵat kórinisin de aq qaǵazǵa túsiredi. Tarıhı kartınalary da bar.

«Sýretshilik – tabıǵatynan talant daryǵan jandarǵa beriletin kásip. Beıneleý óneri adamdy tylsym álemge jeteleıdi. Sýretshilikti kásip kózine aınaldyryp júrgen óner adamy az emes. Isataı Maıemerovtiń de kásibin násibine aınaldyrýǵa múmkindigi bar. Ónerli jasty qoldaý maqsatynda qaıtarymsyz grant beretin konkýrsqa qatysýǵa keńes berdik. Biz úshin eń bastysy – osyndaı talantty jastardyń aýylda turaqtap qalýyna múmkindik jasaý», - deıdi «Atameken» UKP aýdandyq fılıalynyń dırektory Jeksenbaı Pazýlov.