Dımash Londondaǵy kontsertten túsken qarajatty jas talanttardyń ıgiligine jumsamaq

ASTANA. QazAqparat - Qazaq ánshisi Dımash Qudaıbergen Anglııada ótetin kontsertten túsken qarajat Qazaqstannyń jas talanttarynyń halyqaralyq mańyzdy baıqaýlarǵa qatysýyn qoldaýǵa jumsalatynyn jarııa etti, dep habarlaıdy QazAqparat tilshisi.

Eske sala ketsek, Dımash Qudaıbergen Anglııadaǵy áıgili «Royal Festival Hall» zalynda jeke keshin ótkizetinin keshe habarlaǵan edik.

Búgin ánshi óziniń Instagram paraqshasynda kontsertke qatysty barlyq resmı aqparat @kazauenderi akkaýntynda jarııalanatynyn jazdy.

«Ýáde etilgendeı, men sizderge Ulybrıtanııadaǵy Qazaqstan mádenıeti kúnderi aıasynda 19 qarasha kúni Londonda qaıyrymdylyq maqsatta ótetin kontsertim jóninde aqparat beremin. Kommertsııalyq emes kontserttiń uıymdastyrýshysy - Qazaqstan Respýblıkasynyń Mádenıet jáne sport mınıstrligi. Shara Ulybrıtanııadaǵy Qazaqstan Respýblıkasy elshiliginiń qoldaýymen ótedi. Jınalǵan barlyq qarajat Qazaqstannyń jas talanttaryn halyqaralyq mańyzdy baıqaýlarǵa qatystyrýdy qoldaý úshin jumsalady. Kontsert ótetin «Royal Festival Hall» mekemesi tirkeý júrgizýmen aınalyspaıdy. Kontsertke qatysty barlyq resmı aqparat @kazauenderi akkaýntynda», - dep jazdy ol óziniń Instagram paraqshasynda.