Dımash Qytaı arnasynyń jańajyldyq baǵdarlamasynda án shyrqady

NUR-SULTAN. QazAqparat – Álemge tanymal qazaqstandyq ánshi Dımash Qudaıbergen áleýmettik jelide óziniń jańa jyldy qarsy alǵan sátin jarııalady, dep habarlaıdy QazAqparat.

«Jańa jyldy Beıjińde dostarmen birge qarsy aldyq, CCTV arnasynyń jańajyldyq baǵdarlamasynda shyrqaǵan ánimizdi tamashaladyq», - dep jazdy Dımash óziniń Instagram paraqshasynda.

Aıta keteıik, CCTV-1 telearnasynyń jańajyldyq baǵdarlamasynda Dımash Qudaıbergen qytaılyq tenor, Plasıdo Domıngonyń shákirti, Metropolıten Opera solısi Insı Chjanmen dýet oryndady. Olar «Thousands of miles, a common dream» ánin shyrqaǵan.

«Jańa jyl qutty bolsyn, dostar! Barlyqtaryńyzǵa sáttilik, eń qymbat tilekterińizdiń oryndalýyn jáne árqashan kóńilderińizdiń kóterińki bolýyn tileımin! Aldaǵy 2022 jyl jaqsy jańalyqtar jyly bolǵaı! Jaqyn kúnderi men Sizdermen aldaǵy jeke kontsertim týraly jańalyqtarmen bólisemin - nazar sala júrińizder!», - dep quttyqtady D. Qudaıbergen.