Dımash Qudaıbergenniń kontsertine 80 elden 10 myńnan astam sheteldik kórermen keldi
«Búgin men úshin erekshe, umytylmas kún. 5 jasymda meniń ónerge degen betburysymdy baıqap, anam aıaǵynyń aýyrǵanyna qaramastan kúnde óner mektebine aparatyn. Qazir álemniń túkpir-túkpirinen kelgen kórermenderimmen qazaqsha ándi birge shyrqasam deımin. Sizderge kóp raqmet, qoldaýlaryńyzdy sezinip, erekshe shabyttanyp turmyn», - dedi Dımash Qudaıbergen kontsert barysynda.
Mádenı keshti uıymdastyrýshylardyń aıtýynsha, Dımash Qudaıbergenniń jeke kontsertine álemniń 80 elinen 10 myńnan astam sheteldik qonaq kelgen. Olardyń qatarynda Qazaqstannan bólek AQSh, Qytaı, Ulybrıtanııa, Italııa, Frantsııa, Ispanııa, Polsha, Belarýs, Irlandııa, Chehııa, Vengrııa, Fınlıandııa, Ózbekstan, Germanııa, Norvegııa, Túrkııa, Taıvan, Japonııa, BAÁ, Shvetsııa, Kanada, Meksıka, Estonııa, Shveıtsarııa, Bolgarııa, Qyrǵyzstan, Ázirbaıjan, Rýmynııa, Grýzııa, Nıderland, Paragvaı, Belgııa, Ońtústik Afrıka, Lıýksembýrg, Gretsııa, Portýgalııa, Ońtústik Koreıa, Ýkraına, Danııa, Izraıl, Argentına, Chılı, Gonkong, Kosta-Rıka, Kıpr, Avstrııa, Taıland jáne Malaızııa taǵy basqa elder bar.
Dımashtyń jeke kontsertin uıymdastyrýǵa 200-den astam kásipqoı maman atsalysqan. Sahnada Dımash Qudaıbergenmen birge 350-den astam adamnan turatyn halyqaralyq top, sonyń ishinde Qazaqstan, Qytaı, Reseı, Ýkraına, Kamerýn, Gana, Ýganda, Meksıka, Ispanııa jáne Kenııadan kelgen bıshiler, orkestranttar, ánshiler óner kórsetip jatyr.
Kontsert aldynda Dımash Qudaıbergenniń 17 kontsertine bolǵan polshalyq jankúıeri Tereza Kakolmen tildesken edik. Ol qazaq tilin úırenip júr.