Dımash Qudaıbergenniń Japonııada án salǵanyn «Habar» kórsetedi

NUR-SULTAN. QazAqparat - Dımash Qudaıbergen Tokıoda ótetin ABU Song Festival festıvaliniń arnaıy shaqyrylǵan qonaǵy retinde óner kórsetedi. Kórermender halyqaralyq festıvaldiń eksklıýzıvtik arnaıy TV-nusqasyn 22 qarasha kúni, keshki saǵat 21.40-ta «Habar» telearnasynan tamashalaı alady, dep habarlaıdy QazAqparat.

Bul artıstiń Japonııa elinde alǵash ret óner kórsetýi bolady.

Festıval uıymdastyrýshysy - Azııa-Tynyq muhıty habar taratý odaǵy.

Telefestıval básekelestik jarys alańy emes. Bul Azııa-Tynyq muhıty aýmaǵyna kiretin memleketterdiń eń úzdik dep tanyǵan ártisterin usynatyn alań.

«Dımash Qudaıbergenniń aýdıtorııasy Qytaı, Azııa elderinde óte kóp ekenin biz bilemiz. Festıval «Habar» telearnasy efırinen kórermenge jol tartatyn bolady. Sondaı-aq, Koreıa, Japonııa, Indonezııa, Avstralııa, Túrkııa syndy memleketter de qatysady»,- dedi «Habar» telearnasynyń dırektory Dınara Bısembına.

Keshe Dımash Qudaıbergen Instagram paraqshasynda NHK japon ulttyq telearnasyna bergen suhbatymen bólisti. Suhbat barysynda ol Qazaqstan eli, dombyra týraly, óziniń shyǵarmashylyq joly men ustazdary jaıynda sóz qozǵaǵan.

«Qazaqstanda týyp, óskenimdi maqtan tutamyn. Álemniń qaı buryshynda bolsam da, qazaqtyń ulttyq ónerimen sýsyndap, Otanymnyń namysyn,jigerin boıyma sińirgenimdi maqtan tutamyn»,-dedi Dımash.