Dımash Qudaıbergenniń ustazy birlesken josparlary týraly aıtty
Aqtóbe oblysy boıynsha barlyǵy 517 daýys berý ýchaskesi bar. Jalpy óńirde 560 myńǵa jýyq adam óz tańdaýyn jasaı alady. Qazirgi kezde barlyq referendým ýchaskesinde daýys berý júrip jatyr. Óz tańdaýyn jasaǵandardyń biri – ánshi, pedagog Marat Áıtimov.
«Búgin – jaýapty kún. Búkilhalyqtyq referýndýmǵa qatysyp, óz daýysymdy berdim. Men elimizde jaqsy ózgerister bolatynyna senemin, alǵa úmitpen qaraımyn. Halyq turmysynyń jaqsaryp, tabystyń artqanyn qalaımyn. Oǵan bizdiń elimizdiń kúshi jetedi. Adamdar da quqyqtyq jaǵynan saýatty bola tússe, jetistigimiz bolar edi. Halyq bılikke emes, bılik halyqqa jumys isteıtin ýaqyt jetti», - dedi Marat Áıtimov.
Keıin ol ánshi Dımash Qudaıbergenge qatysty aqparatymen bólisti.
«Dımashpen birneshe kún buryn sóılestim. Qazir ol Mekkede ájelerimen birge júr. Árdaıym baılanystamyz. Oqýshylarymnyń barlyǵyn maqtan etemin. Árqaısysynyń orny bólek. Dımashtyń orny alabóten. Dımashtyń bizdiń memleketimizdiń, jalpy ıisi qazaqtyń atyn shyǵarýdaǵy jumysyn osy kezge deıin birde-bir qazaq jasaǵan joq dep aıtsam, artyq ketpeımin dep oılaımyn. Qazir habarlasyp, keńes suraıdy. Kóbi kásibı jumysqa baılanysty. Jeke ómirin de aıtady. Dımashqa qatysty syn aıtylady. Bárine unaý múmkin emes. Keıbiri tıse terekke, tımese butaqqa dep aýzyna kelgenin aıtyp jatady. Ol kezde adamdardyń pıǵyly qaryn ashtyrady. Bir ándi birge oryndaımyz degen josparymyz bar. Ázir júzege aspaı jatyr. Jańa án nemese halyq áni bolýy múmkin», - dedi Marat Áıtimov.