Dımash Qudaıbergenniń shyrqaǵan áni «Azııanyń jańa ánderi» reıtıngine kirdi

ASTANA. QazAqparat - Qytaıdyń Hýnan telearnasynyń «Singer - 2017» án baıqaýynda óner kórsetip jatqan qazaqstandyq ánshi Dımash Qudaıbergenniń jobanyń tórtinshi kezeńinde shyrqaǵan Qytaısha «Qońyr kúz» (秋浓意) áni jáne besinshi kezeńde oryndaǵan Uptown Funk áni «Azııanyń jańa ánderi» (Freshasia music) reıtıngine kirdi, dep habarlaıdy QazAqparat.

«Qońyr kúz» áni 2055 upaımen aptalyq Top-20  reıtınginde 20 orynnan, jalpy reıtıngte 34 orynnan kórindi. Al Uptown Funk áni 2986 upaı jınap, jalpy reıtıngte 29 orynǵa jaıǵasty. Reıtıngti Dımashtyń qarsylasy Chjan Tsze 137710 upaımen kósh bastap tur.
 

Aıta keterligi, «Azııanyń jańa ánderi» reıtıngine bir jolda ánshiniń úsh áni kirýine múmkindik bar.

Reıtıng Azııalyq ánshilerdiń Qytaıdaǵy tanymaldylyǵyna baılanysty jasalady. Onda úsh aıdyń ishindegi barlyq Azııalyq ánshilerdiń Qytaıdaǵy tyńdalymy, bólisýi jáne aqyly túrde júktep alýy arqyly upaı sanalyp, reıtıng qurylady. Reıtıng ár 10 mınýt saıyn jańalanyp, jyl sońynda jyldyq TOP reıtıng jarııalanady.
 

Qytaıdy óz talantymen tánti etken jerlesimiz «Singer - 2017» jobasynda osy ýaqytqa deıin bes án oryndady. Buǵan deıin Dımash Qytaıdyń merekelik kontsertinde qazaqtyń «Oı jaılaý» ánin shyrqaǵanyn habarlaǵan bolatynbyz.

Dımash Qudaıbergen «Singer - 2017» jobasynda az ýaqyttyń ishinde Qytaıdaǵy eń yqpaldy juldyzdardyń birine aınaldy. Óz elinde osynshalyqty tanymal bolý úshin Qytaılyq juldyzdardyń ózi qansha jylyn sarp etkeni málim. Bul kúnde Qazaqstandyq ánshi 9 qańtarda ashqan Sina Weibo (Týıtterdiń balamasy) áleýmettik jeke paraqshasyna jazylǵan jankúıerler sany 2 mıllıonnan asyp ketti.
 

Eske sala keteıik, Dımash 25 aqpan kúni baıqaýdyń úshinshi aınalymyn (altynshy kezeń) bastaıdy. Otandasymyz Lara Fabıannyń repertýarynan «Adagio» ánin oryndamaq.