Dımash Qudaıbergenniń fan-klýby Nıý-Iorkte úsh jyldyǵyn atap ótti
Manhettenniń týra ortalyǵynda Qazaqstannyń týy jelbirep, Uly dalanyń áýenderi shyrqaldy. Álemge áıgili ánshiniń amerıkalyq jankúıerleri óz kýmıri men onyń Otanynyń qurmetine tosynsyıdy tátti dám túrinde daıyndapty. Ataýly kúnge oraı japondyq Norıko Brýnel hosh ıisti ári túrli-tústi keksterdi pisirgen eken. Kekste qazaqtyń oıý-órnekteri men Dımash Qudaıbergenniń beınesi tur. Nıý-Iorktegi ómiriniń 30 jylynda japondyq basqa qurlyqtyń mádenıetine dál osylaı tuńǵysh ret erekshe áýestengenin aıtady. Osylaısha, fan-klýb ókilderi juldyzdy otandasymyzǵa rızashylyqtary men qurmetterin bildirýge baryn salǵan.
«Birde Facebook qoldanýshylarynyń biri Dımashtyń oryndaýyndaǵy S.O.S ánin óz paraqshasynda jarııalady. Dımashtyń daýsyn tyńdaǵan sátten-aq men tań-tamasha qaldym. Jubaıym frantsýz bolǵandyqtan, osy ándi soǵan tyńdatyp kórsettim. Ándi tyńdap otyryp, Dımashqa ǵashyq bolyp qalǵandaı sezimde boldym. Biz, Dımash Qudaıbergenniń Halyqaralyq fan-klýbynyń, DKIFC-tiń jáne «Dimash USA» fan-klýbynyń múshesimiz. Dımash osynda ushyp kelgende, biz ony barynsha qoldaýǵa, Nıý-Iork halqyna ony kóbirek tanytýǵa qatty tyrysamyz», - dedi AQSh-taǵy fan-klýb múshesi Norıko Brýnel.
Úsh jyl buryn AQSh-ta Dımash Qudaıbergenniń jankúıerleriniń klýbyn qurǵan amerıkalyqtar Qazaqstanǵa mindetti túrde kelý týraly sheshim qabyldapty. Kóbi Nur-Sultan men Almatyda bolyp úlgergen. Olardyń arasynda Ońtústik Afrıkada dúnıege kelgen Tanıa ıAng ta bar. Ol qazir birshama jyldan beri Nıý-Iorkte turady.
«Sizderdiń astanalaryńyz - Nur-Sultan men úshin erekshe jáne fýtýrıstik orynǵa aınaldy. Óziniń sáýletimen, tazalyǵymen, keńdigimen erekshelenedi eken. Men Dımashtyń Qazaqstanda osyndaı kondıterlik ónimdermen shaı ishkendi unatatynyn jaqsy bilemin. Bul - shaı ishýdiń ózindik mádenıeti. Sondyqtan biz Dımashtyń shaı ishý dástúrin qoldaı otyryp, ózim ázirlegen tátti-dámdini Norıkonyń daıyndaǵan keksine qosyp qoıdym. Dımashtyń ánderiniń ishinde maǵan eń unaıtyny - «Umytylmas kún», al oryssha ánderinen - «Lıýbov, pohojaıa na son». Árıne, men «Daıdıdaýdy» da súıip tyńdaımyn», - dedi Nıý-Iork turǵyny Tanıa ıAng.
Amerıkalyq Chelsı Dımond 2018 jyldyń naýryzynan beri fan-klýbtyń múshesi. Sodan beri ol Dımashtyń ánderin oryndap, qazaq tilin úırene bastaǵan.
«2018 jyldyń naýryz aıynda Youtube kanaldan bir kórip qaldyq ta, sol sátten bastap Dımashtyń jankúıerine aınaldyq. Ol men úshin beıtanys Qazaqstandy ashty. Qazaqstan jaıly buryn eshteńe bilmeıtin edim. Endi men osy elge ǵashyq bolyp qaldym! Mahabbat ber maǵan, taǵdyr, júrekti qozǵaǵan. Janymdy jalynǵa orap, úzilmeı mazdaǵan. Mahabbat ber maǵan, taǵdyr, mahabbat ber maǵan. Eshqashan, eshkimde, esh kez bolmaǵan», - dep ándetip ketti Chelsı Dımond sóziniń sońynda.
Mýzykalyq álemniń búkil qyr-syry bir Dımashtyń boıynan aıqyn kórinedi dep esepteıdi gonkongtyq Emı Tseı. Ol Nıý-Iorkte týyp, júregin qazaq ánshisi jaýlap alatyny úsh uıyqtasa túsine kirmepti.
«Men qatty áserlendim. Onyń ónerin baqylaı otyryp, belesterdi bir-birlep qalaı baǵyndyrǵanynyń kýási boldym. Shynynda da, oılap qarasańyz, az ýaqyttyń ishinde osynshama bıikke kóterilgen ánshiler neken-saıaq. Álbette, Bıtlz toby óz tusynda keremet boldy. Biraq, bizdiń Dımash óz qarqynynan taımasa jýyq arada olardyń deńgeıine de jetedi», - deıdi Emı Tseı.
Amerıkalyq jankúıerlerdiń taǵy biri brýklındik Dennıs Dımashqa uqsaıtyn, tipti onyń janyna jaqyndaı alatyn ánshiler álemde kemde-kem ekenin aıtady.
Amerıkadaǵy fan-klýb músheleri osylaısha óz áserimen bólisip, kýmırlerin asyǵa kútip júr.