Dımash Qudaıbergenniń bıýdjetten qansha qalamaqy alatyny belgili boldy

ASTANA. QazAqparat – Mádenıet jáne sport mınıstrliginiń buıryq jobasynda Dımash Qudaıbergenniń bıýdjet esebinen ótetin mádenı sharalarda qansha qalamaqy alatyny aıtylǵan, dep habarlaıdy QazAqparat tilshisi.

Qujatta Dımash Qudaıbergen, Janar Duǵalova, Maıra Muhammedqyzy, Asylbek Eńsepov, Tamara Asar, Zyna502 sııaqty oryndaýshylardyń memlekettik mádenı is-sharalarda óner kórsetkeni úshin alatyn qalamaqysy mysal retinde berilgen.

«Tájirıbe kórsetkendeı, Qazaqstannyń eńbek sińirgen ártisi, Qazaqstannyń eńbek sińirgen qaıratkeri, ádebıet jáne óner salasyndaǵy memlekettik syılyqtyń laýreaty, «Mádenıet qaıratkeri» tósbelgisiniń ıegeri, «Mádenıet qaıratkeri» tósbelgisi ıegeri sanatyndaǵy birneshe óner qaıratkeri (mysaly: Dımash Qudaıbergen 10 000 000 teńgeden jáne odan joǵary, Maıra Muhammedqyzy - 3 000 000, Álisher Kárimov - 1 500 000, Asylbek Eńsepov 1 300 000, Zyna502, Medet02, Medet05 - 1 500 000, Nurlan Abdýllın 1 000 000, Janar Duǵalova 1 500 000, Aıgúl Ólkebaeva 700 000, Tamara Asar 1 200 000 teńgeden jáne taǵy basqalar).

Shyndyǵynda kórsetiletin qyzmetterdiń quny 20% deıin jetýi múmkin jáne odan da joǵary, bul paıyzdan asyp túsedi.

Ótkizip jatqan is-sharalardy saraptaı kele, shara bıýdjetiniń 20%-ǵa deıini osy sanattaǵy ártisterdiń qatysýyn qamtamasyz etý qyzmetterine jumsalatyny shyǵady.

Osylaısha, joǵaryda atalǵandardy eskere otyryp, osy tarmaqty standart boıynsha jalpy somanyń 7%-ǵa deıin oryndaý múmkin emes, sondyqtan osy standartty jobanyń jalpy somasynan 20%-ǵa deıin arttyrýdy suraımyz», - delingen buıryq jobasyna qosymsha berilgen kestedegi túsindirmelerdiń birinde.