Dımash Qudaıbergenniń Astanada ótetin kontsertiniń kúni belgilendi
Bul týraly ánshiniń ózi Instagram paraqshasynda jazdy.
«Kún belgilendi! Bul eń úzdik shoý bolmaq. Bılet satylymy týraly keıinirek habarlaımyz. Qazaqstanda 29 maýsymda kóriskenshe!», - dep jazdy ánshi.
Eske sala ketsek, buǵan deıin Dımash Qudaıbergen Jastar jyly aıasynda Astanada «Arnaý» atty kontsert beretinin habarlaǵan bolatynbyz.
«Biz sizdermen úlken mańyzdy jańalyqty bóliskimiz keledi. Biz óz tarapymyzdan talantty jastardy qoldaýǵa daıynbyz. Onyń ústine ózderińiz biletindeı, bıylǵy jyl Jastar jyly dep jarııalanǵan bolatyn. Dımash elimizdiń, halqymyzdyń birtýar azamaty, qazaqtyń óneri arqyly elimizdiń atyn búkil álemge tanytyp júrgen talantty tulǵa. Bunyń aldynda Dımash Ulttyq arnadaǵy jańa jyldyq shoýǵa qatysqan bolatyn. Al búgingi aıtylyp jatqan joba boıynsha biz Dımashpen birneshe ret kezdesip, aqyldasqan bolatynbyz», - degen edi OKQ-da ótken baspasóz máslıhatynda «Qazaqstan» RTRK AQ tóraǵasy Erlan Qarın.
Onyń aıtýynsha, Dımashtyń Astanadaǵy kontsertinde álemdik shoýlardaǵy tehnologııalar paıdalanylady.