Dımash Qudaıbergen jankúıerlerin Reseıdiń 3 qalasyndaǵy kontsertine shaqyrdy
22:15, 26 Jeltoqsan 2019
NUR-SULTAN. QazAqparat – Ánshi Dımash Qudaıbergen jankúıerlerin Reseıdiń úsh qalasyndaǵy jeke kontsertine shaqyrdy, dep habarlaıdy QazAqparat.
«Qurmetti dostar! Barshalaryńyzdy Jańa jyl merekesimen quttyqtaı otyryp, Reseı boıynsha aqpanda ótetin shaǵyn týr aıasynda jeke kontsertterime shaqyramyn. Men sizdermen 16 aqpanda Krasnodarda, 20 aqpanda Qazanda, 23 aqpanda Ekaterınbýrgte kezdessem deımin.», - dep jazdy ánshi instagram paraqshasynda.
Eske sala ketsek, búgin ǵana Dımash Qudaıbergen Qytaıdyń «Internet Bull Ears awards 2019» júldesin jeńip alǵan bolatyn.
«Internet Bull Ears awards-2019. Qytaı. Beıjiń. Qytaı júldesi úshin kóp rahmet. Jyldyń úzdik ártisi marapatyn alý – úlken ǵanıbet. Barlyq jankúıerlerime, uıymdastyrýshylaryma jáne qytaılyq komandama alǵys aıtamyn», - dedi ol.