Dımash Qudaıbergen tyń chellendj bastady

ASTANA. QazAqparat – Tanymal ánshi Dımash Qudaıbergen qazaqtyń uly aqyny Abaı Qunanbaıulynyń týǵan kúni qarsańynda tyń chellendj bastady, dep habarlaıdy QazAqparat.

«Assalaýmaǵaleıkým, qurmetti dostar, otandastar! Hakim Abaı atamyzdyń mereıtoıy qarsańynda ádemi chellendj bastaǵaly otyrmyz. Abaı atamyzdyń dál men sekildi júrekterińiz qalaǵan kez kelgen shyǵarmasyn jattap nemese oqyp, dál osylaı beınetaspaǵa túsirip, jelige salyp, taratatyn bolsańyzdar, chellendjimizdiń bastalǵany dep bilemin», - dedi ánshi Instagram paraqshasy arqyly oqyrmanyna joldaǵan chellendjinde.

Dımash Qudaıbergen beıneúndeý barysynda Abaı Qunanbaıulynyń «Ǵylym tappaı maqtanba» óleńin jatqa oqydy.

«Bul chellendjdi álemdegi barlyq jankúıerlerime jáne ónerdegi áriptesterime joldaǵym keledi. Elimiz aman, jurtymyz tynysh bolǵaı», - dep atap ótedi ánshi sóz sońynda.

Aıta keteıik, búgin oqýshylar arasynda dástúrli respýblıkalyq Abaı oqýlary bastaldy.