Dımash Qudaıbergen osy aptada Malaızııada alǵashqy kontsertin ótkizedi

ASTANA. QazAqparat – 24 maýsymda Malaızııa astanasy Kýala-Lýmpýrda Dımash Qudaıbergenniń alǵashqy «Stranger» jeke kontserti ótedi, dep habarlaıdy QazAqparat dimashnews.com saıtyna silteme jasap.

Úlken shoý qarsańynda kontsertti uıymdastyrýshylar kontsertke bılettermen jáne ártistiń aty jazylǵan eksklıýzıvti ónimdermen túrli is-sharalar ótkizdi. Vokalıster baıqaýy qyzyqqa toly boldy, basty júlde jeńimpazdar úshin kontserttiń shymyldyǵyn ashatyn qonaq retinde óner kórsetý múmkindigi boldy.

Baıqaýda Dımashtyń repertýarynan «S.O.S», «Adajıo», «Opera-2» sııaqty tanymal ánder shyrqalady. Baıqaý júldegerleri jas mýzykanttar Lim Yue Zhen jáne Aric Lau, al jeńimpaz – «Znaı» ánin oryndaǵan 16 jastaǵy ánshi Eshan boldy.

Sondaı-aq, Malaızııanyń eń tanymal ánshileriniń biri – Dato Shrı Sıtı Nýrhalıza kontserttiń arnaıy qonaǵy retinde qatysatynyn jarııalady. Sıtı Nýrhalıza Dımashtyń oryndaýyn joǵary baǵalaıdy. Kontsertte arnaıy qonaq bolý múmkindigi týraly suraqqa jaýap bergende Sıtı Nýrhalıza Dımashtyń ánshilik qabiletine, shyǵarmashylyǵyna tánti bolǵanyn aıtty.

«Dımashtyń daýysy keremet, meıli ol joǵary notada bolsyn, tómen notada bolsyn, esh qıyndyqsyz erkin aýysa alady, óte keremet án aıtady», – dep atap ótti Dato Shrı Sıtı Nýrhalız xuan.com.my basylymyna bergen suhbatynda.