Dımash Qudaıbergen: Maqsatym – qazaq ártisterin álemge tanytý
«Aldaǵy jyldary úlken jobalardy qolǵa alamyn. Men qazir múmkindikterimdi tıimdi paıdalanǵym keledi. Halyqaralyq arenaǵa qazaqtyn ul-qyzdaryn shyǵarsam deımin. Barynsha qoldap, jol siltep, myqty menedjerlermen tanystyryp, úlken agentterge kórsetip, jol salyp bergim keledi. Meniń de dáýrenim ótpeli. Bul kún búgin bar, erteń joq. Sondyqtan qazaqqa qazaqtyń múddesi úshin paıdamdy tıgize alsam odan basqa meniń armanym joq. Men 5 jasymnan bastap mýzykadan dáris alyp kele jatyrmyn. Bıyl doktorlyq dárejemdi qorǵaımyn. Jınaǵan tájirbıemdi úlken ánshi bolýdy armandap júrgen jas jetkenshektermen bóliskim keledi»,- deıdi Dımash Qudaıbergen.
Ol sondaı-aq túrli qalalar men elderden ushyp kelgen jankúıerlerine alǵys aıtty. Respýblıka saraıynyń sahnasynda júrgizýshiniń suraqtaryna jaýap bere otyryp, Otanǵa degen súıispenshiligin bildirdi. Ánshi «Otanyń qandaı?» degen suraqqa jaýap berdi.
«Ruqsat etseńiz, men bul suraqqa fılosofııalyq turǵydan jaýap bereıin. Aǵylshyn-amerıkalyq jazýshy Tomas Peın bylaı degen eken: «Jer – meniń Otanym, barlyq adamdar – meniń baýyrym» degen. Bul jerde men óz Otanymdy, elimdi, halqymdy súıetinimdi aıtqym keledi, biraq men adamzatty dinge, elge, ultqa bólgim kelmeıdi. Biz, qazaq – dana halyqpyz, ár adam ózi úshin jaýapty. Dostaryna, aınalasyna meıirimdi bolýy kerek, sonda bul adam óziniń danalyǵyn kórsetedi. Meniń oıymsha, árbir memleket osy fılosofııany ustanýy qajet. Ata-babalarymyz osy Jer úshin kúresip, ony urpaqtaryna amanat etip qaldyrdy. Al biz ony keıingi urpaqqa jetkizýimiz kerek. Biz uly bolashaqqa daıyn ekenimizdi, uly babalardyń urpaǵy ekenimizdi kórsetýimiz kerek. Búkil álemde beıbitshilik bolsyn»,- dedi ol