Dımash Qudaıbergen kontsertinen túsken qarajatty Túrkııadaǵy zardap shekkenderge aýdarady

ASTANA. QazAqparat – Qazaqstandyq tanymal ánshi Dımash Qudaıbergen «Stranger» álemniń týrnesinen túsken qarajattyń bir bóligin Túrkııada zilzaladan zardap shekkenderge aýdarady, dep habarlaıdy QazAqparat.

«Qazaq halqyna baýyrlas, aǵaıyn el bolyp sanalatyn Túrkııadaǵy, Sırııadaǵy jáne basqa da elderde tabıǵattyń zalalynan kóptegen adamnyń qaza tapqanyn estidik. Árıne, zor kúızelispen qabyldap otyrmyz. Barlyq dúnıe salǵan adamdardyń jaqyndaryna qaıǵyra kóńil aıtamyz. Aýyr halde kúı keship jatqan baýyrlarymyzǵa tezirek saýyǵyp ketýin tileımiz», - dedi qazaqstandyq ánshi óziniń Instagram paraqshasynda.

Osy tusta ánshi álem boıynsha uıymdastyrlyp jatqan jeke keshterinen túsken qarajattyń bir bóligin zardap shekken otbasylarǵa kómek retinde aýdaratynyn aıtty.

«Ár otbasyǵa amanshylyq tileımin. Aspanymyz ashyq, álem atty ortaq úıimiz apat pen zilzaladan aman bolsyn. Elimizde, álemde tynyshtyq bolsyn! Barsha álem halqy baqytty bolsyn!», - deıdi Dımash Qudaıbergen.

Aıta keteıik, búgin qazaqstandyq qutqarýshylar men dárigerler borty Gazıantep qalasyna qonady.

Sońǵy derekter boıynsha, Túrkııada zilzaladan kóz jumǵan adamdar sany 3419 adamǵa jetti, 20534 adam jaraqat aldy.

Foto: instagram.com/kudaibergenov.dimash