Dımash Qudaıbergen ІІ Eýropalyq oıyndardyń ashylý saltanatynda óner kórsetedi

NUR-SULTAN. QazAqparat -Dımash Qudaıbergen Mınskide ótetin ІІ Eýropalyq oıyndardyń ashylý saltanatynda óner kórsetedi. Bul týraly ánshi Instagram-daǵy jeke paraqshasynda jazdy, dep habarlaıdy QazAqparat tilshisi.

«Jaqynda jańa ánniń premerasy bolady. II Eýropalyq oıyndardyń ashylý saltanatynda kezdeskenshe...», - dep jazdy ol Instagram jelisinde.

ІІ Eýropalyq oıyndar sporttyq sharasynyń ashylý saltanaty aldaǵy maýsym aıynyń 21-i kúni ótedi. Jarysqa Eýropanyń 50 elinen 4 myńnan astam sportshy qatysatyny kútiledi.

Eske sala keteıik, Dımash Qudaıbergen óziniń alǵashqy albomy 14 maýsym kúni jaryqqa shyǵatynyn jarııalaǵan edi. Ánshi osy kúnderi 29 maýsymda elordada ótetin «Arnaý» atty jeke kontsertine daıyndyq ústinde. Jaqynda mýzykalyq keshtiń vıdeojarnamasy jarııalandy.

Álıhan Asqaruly