Dımash Qudaıbergen Halyqaralyq kóshi-qon uıymynyń izgi nıet elshisi atandy
HKU búgin ártister, sýretshi, sportshy jáne basqa da belgili tulǵalardan turatyn toǵyz izgi nıet elshisi taǵaıyndalǵanyn habarlady. Ótken jyldyń qarasha aıynda olımpıada chempıony Mo Farah alǵashqy jahandyq elshi bolǵan edi.
Іzgi nıet elshileri kóshi-qon múmkindikterine qoldaý kórsetip, álem boıynsha talanttardyń tanylýyna yqpal etedi. Toǵyz elshi qatarynda segiz jeke tulǵa jáne bir fýtbol klýby bar.
«Men bul tanymal tulǵalardy HKU-nyń jańa aımaqtyq jáne ulttyq izgi nıet elshileri retinde qarsy alǵanyma óte qýanyshtymyn. Olar dúnıe júzi boıynsha shabyt syılaýshylar. Olarmen kúsh-jigerimizdi biriktire otyryp, ózgeris jasaıtynymyzǵa senemin», - dedi HKU Bas dırektory Emı Pop.
«HKU izgi nıetti elshisi retinde men mıgranttardyń quqyǵyn qorǵaıtynymdy maqtan tutamyn. Ár adamnyń quqyǵy qorǵalǵan jáne múmkindikterge ashyq álem úshin birigeıik», - dedi ánshi Dımash Qudaıbergen.
Іzgi nıet elshilerin óz elderindegi HKU ókilderi resmı túrde taǵaıyndady jáne olardy muqııat baǵalaýdan keıin tańdady.
«Otbasylyq tájirıbemnen aıta alamyn, kóshi-qon durys júrgizilse, paıdasy kóp. HKU izgi nıetti elshisi retinde men mádenı muram men sporttyq tájirıbemdi aqparattandyrýdy joǵarylatý úshin paıdalanǵym keledi», - dedi tanymal fýtbolshy Mýktar Dıakabı.
Dımash Qudaıbergenmen birge HKU izgi nıet elshileri qatarynda ganalyq aktrısa jáne telejúrgizýshi Ama K. Aberez, Argentına/Arýbadan fotograf Nıkolas Marın Benıtes, Mavrıkıı fotografy Pol Choı, gvıneıalyq fýtbolshy Mýktar Dıakabı, Ganadan kelgen mýzykant jáne án jazýshy Kofı Kınaata, bosnııalyq basketbolshy Djanan Musa, Albanııa psıhology, jýrnalıst ári jazýshy Mırela Sýla, sondaı-aq ýrýgvaılyq Atletıko Penıarol fýtbol klýby bar.
1951 jyly negizi qalanǵan HBU – kóshi-qon salasyndaǵy jetekshi úkimetaralyq uıym. HBU BUU júıesine 2016 jyly baýyrlas uıym retinde qosyldy.