Dımash Qudaıbergen ekinshi aınalymnyń qorytyndysy boıynsha - ekinshi orynda

ASTANA. QazAqparat - 11 aqpan kúni Qytaıda ótip jatqan «Singer - 2017» án baıqaýynyń tórtinshi kezeńi efırde kórsetilip,  qazaqstandyq ánshi Dımash Qudaıbergen úshinshi orynnan kórindi.

Ekinshi aınalymnyń eki jarys kúniniń (úshinshi jáne tórtinshi kezeń) qorytyndysy boıynsha, Dımash sáıkesinshe 14,82% jáne 15,56% daýystar jınap, qorytyndy esepte 15,19% daýyspen ekinshi orynǵa ornalasty. Osylaısha ol kelesi aınalymǵa ótti.

Ekinshi aınalymnyń qorytyndysy:

1.    Tan Tszın (19%)

2.    Dımash Qudaıbergenov (15,19%)

3.    «Lion» rok toby (14,53%)

4.    Sandy Lam (14,09%)

5.    Chjao Leı (13,01%)

6.    Chjan Tsze (12,28%)

7.    Dý Lısha (11,87%)

Aıta keteıik, jerlesimiz birinshi kezeńde 27,00%, al ekinshi kezeńde 24,36% daýys jınap, birinshi aınalymnyń qorytyndysy boıynsha 25,68% daýyspen bas júldeni enshilegen bolatyn.

Buǵan deıin habarlaǵanymyzdaı, 5 aınalymnan turatyn irikteý kezeńiniń ár aınalymy eki kezeńdi qamtıdy, baıqaý jalpy on kezeńge bólingen. Jobanyń ár aınalymynyń eki jarys kúninen keıin jalpy qorytyndy jarııalanady. Tórtinshi kezeńde Dý Lısha hanym tórtinshi oryndy ıelengenimen, qorytyndy esep boıynsha jetinshi orynnan kórinip, jarys jolynan shyǵyp qaldy.

Dımash besinshi kezeńde amerıkalyq ánshi Pıter Djın Ernandestiń (Brýno Mars) repertýarynan «Uptown Funk» ánin oryndamaq.