Dımash Qudaıbergen Aqtóbede fanattarymen kezdesti

AQTÓBE. QazAqparat - Dımash Qudaıbergenniń fantop jetekshileri búgin ánshimen, onyń otbasymen kezdesýge múmkindik aldy, dep habarlaıdy QazAqparat tilshisi.

«Jeti aı buryn týǵan kúnimnen soń ıýtýbty qarap otyryp, Dımashty kórdim. Keıin Qytaıdaǵy baıqaýda aıtqan ánderin tyńdap, birden ǵashyq boldym. Armanym ánshimen kezdesý boldy. Turmystamyn, eki balam bar. Shynymdy aıtsam, kúıeýim meni Dımashtan kishkene qyzǵanady. Men Qazaqstanǵa kelgenime, Dımashty kórgenim úshin baqyttymyn»,- dedi Dımash Qudaıbergenniń Polshadaǵy fantop jetekshisi Monıka Vasılevskaıa.

Dımash Qudaıbergenniń fanattary «Daıdıdaý» ánin jaqsy kóredi ári jıi tyńdaıdy. Tipti, árqaısysy uıaly telefondaryna tek Dımashtyń ánderin júktep alǵan. Olar qazaq tilin de úırenip júr. 
«Dımash adamdardyń ómirin ózgertedi jáne álem halqyn biriktiredi. Alǵash ret áleýmettik jeliden kórip, tańqaldym. Ózim ótken jyly EKSPO kórmesi aıasynda bolǵan «Bastaý» kontsertinde boldym. Ózim AQSh-ta turǵanymmen, oıym únemi Qazaqstanda. Dımashtyń ana tilinde oryndaǵan ánderiniń sózderin túsinbeımin, biraq júregimmen sezinemin», - dedi AQSh kelgen fantop jetekshisi Alısa Kellog.

Aıta keteıik, fantop músheleri erteń Dımash Qudaıbergen oqyǵan mektep pen kolledjge baryp, «Baqytty bala» baıqaýyna qatysyp, qazaqstandyq ónerpazdardyń kontsertin tamashalaıdy.

«Dımashty dostary, otbasy qatty jaqsy kóredi. Ol óz Otanynyń patrıoty. Bul álem úshin úlgi, jaqsy mysal», - dedi Alısa Kellog.