Dımash esirtki baronyn quryqtady

ASTANA. QazAqparat - Nıý-Iork qalasynyń polıtsııasynda jumys istep júrgen qazaqstandyq Dımash Nııazov esirtki baronyn ustaǵany úshin arnaıy nagradaǵa ıe boldy. Bul týraly Shymkent qalasyndaǵy jergilikti polıtsııa qyzmetiniń bastyǵy Danııar Meıirxan Feısbýktegi  paraqshasynda jazdy, dep habarlaıdy QazAqparat tilshisi.

«Nıý-ıork qalasynda meniń əriptesim Dımash Nııazov týraly taǵy aıta bastady. Óıtkeni Qazaqstannyń týmasy arnaıy nagradamen marapattaldy. Oǵan óz qyzmetin abyroımen atqarǵany úshin arnaıy jeton tabystaldy. Dımash esirtki baronyn quryqtap, Brýklın aýmaǵynda qylmystyń tómendeýine qomaqty úles qosty.  Baıqasańyzdar, jetonda Amerıka Qurama Shtattarynyń týy bar. Al tómengi jaǵynda Qazaqstannyń baıraǵy beınelengen», - dep jazdy Dımashtyń qazaqstandyq áriptesi.

Danııar Meıirxan óz áriptesin quttyqtaı kele, quqyq qorǵaý organdarynda basshylyq pen qyzmetkerler arasyndaǵy qazirgi qarym-qatynas problemasyn kóterip, belsendi qyzmetkerlerge qatysty teris psıxologııadan, eski mentalıtetten arylý qajettigi jaıynda oı qozǵaıdy. «Álemniń qaı memleketi bolsa da, pogon taqqan adam úshin onyń eńbegin baǵalaıtyn basshylyqtyń bolǵany mańyzdy. Ókinishke qaraı, bizdiń júıemizde basqasha. Qatardaǵy qyzmetkerler kóp jaǵdaıda marapattaýsyz qalyp jatady. Tipti, basshylyqtyń alǵys sózin de estimeıdi. Alaıda dál sol qarapaıym qyzmetkerlerdiń kún-tún demeı, jumys istep júrgenin umytpaý qajet. Áıtpese, basshylar naǵyz eńbekqor qyzmetkerlerdi mansapqumar deıdi de, olardyń jumys sapasyn kóterýge degen áreketterin teris qabyldaıdy», - deıdi Meıirxan.
 

Aıta keteıik, shymkenttik Dımash Nııazov 13 jasynda AQSh-qa kóship ketken. Úsh jyldan beri NYPD (New York City Police Department) - Nıý-Iork qalasynyń polıtsııa departamenti jumys istep keledi. 2017 jyldyń basynda ol úzdik polıtseı retinde tanylǵan bolatyn.