Dımash elordada Denıs Tenge arnap án shyrqady

NUR-SULTAN. QazAqparat - Dımash Qudaıbergen elordada ótip jatqan jeke kontsertinde Denıs Tendi eske alyp, arnaıy án oryndady, dep habarlaıdy QazAqparat tilshisi.

«Denıs Tenmen dýet bolyp óner kórsetý josparymyz bolǵan. Ókinishke qaraı, josparymyz oryndalmaı ketti. Denıs týma talant boldy, óte kóp eńbektenetin. Ol qazaq halqyn bıikterge kótergen abzal azamattardyń biri. Denıstiń beınesi bizdiń máńgi jadymyzda, júregimizde qalady. Ol qazaqtyń mańdaıyna bitken jaryq juldyz», - dedi D. Qudaıbergen jeke kontsertinde sóılegen sózinde.

Án sońynda keshke qurmetti qonaq retinde shaqyrylǵan Denıs Tenniń ata-anasyna kontsertke kelgenderi úshin alǵysyn bildirip, gúl shoǵyn syılady.

Eske salsaq, qazaqstandyq mánerlep syrǵanaýshy Denıs Ten ótken jyly 19 shilde kúni pyshaq jaraqatynan kóz jumǵan edi. Oqıǵa Qurmanǵazy men Baıseıitova kósheleriniń qıylysynda saǵat 15:00 shamasynda boldy. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi.

2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy. Adam óltirý babymen qylmystyq is qozǵaldy. Keıin belgili bolǵandaı, sportshynyń ólimine qatysy bar kúdiktiler ustalyp, qylmystaryn moıyndady. Ustalǵan úsh adamdy qamaýda ustaý merzimi 22 qarashaǵa deıin uzartyldy.