Dımash Astanaǵa jasyryn kelýge tyrysqan

ASTANA. QazAqparat - Qytaıdaǵy «Singer-2017» án baıqaýyna qatysyp jatqan otandasymyz Dımash Qudaıbergen jobanyń jetinshi kezeńiniń túsiriliminen keıin 25 aqpan kúni túnde Astanaǵa kelgen bolatyn. 

Qytaıda jankúıerlerinen aıaq alyp júre almaıtyn Dımashty Astanada bir shaǵyn top fanattary ǵana qarsy alǵanyn jazǵanbyz. Búgin jýrnalıstermen áńgimelesken Dımashtyń resmı ókili Alpamys Shárimov bunyń sebebin túsindirip berdi, dep habarlaıdy QazAqparat.
«Astanaǵa keletinimizdi eshkim bilgen joq. Biz meılinshe jasyryn kelýge tyrystyq. Biraq, kútip alǵan árbir adamǵa alǵysymyz sheksiz. Sebebi, biz dál sol reıspen keletinimizdi aıtqan joqpyz, qaıdan bilip qoıǵanyn ózimiz de bilmeımiz. Keledi dep aıtylǵan, biraq, qaı reıspen keletini belgisiz edi»,-deıdi Dımashtyń resmı ókili.

Alpamys Shárimov sondaı-aq Astanaǵa kelgende Dımashty eshkim qarsy almady degen pikirlerge túsinikteme berdi. Onyń aıtýynsha, Qazaqstan men Qytaıda ushaqtarǵa bılet alýdyń tártibi eki túrli. ıAǵnı, Qytaıda belgili bir reıske kimderdiń bılet alǵany ınternetke ilinedi eken.

«Al, Qazaqstanda olaı emes. Sondyqtan, eki jaqtyń bılet alýynyń júıesi eki túrli bolǵan soń, Dımashtyń Astanaǵa keletinin kóp eshkim bilgen joq»,-dep túsindirdi Alpamys Shárimov.

Aıta keteıik, Qytaıda ótip jatqan «Singer-2017» án shoýynyń jetinshi kezeńinen keıin Dımash Qudaıbergen Qazaqstanǵa kelgen bolatyn.