«Dıkıı» Arman men Qaırat Qudaıbergenniń isi jabyq túrde qaralatyn boldy

<p><span style="font-family: sans-serif; font-size: 18px;">Búgin Almatyda Arman Jumageldıev pen Qaırat Qudaıbergenge qatysty qylmystyq is boıynsha aldyn ala tyńdaý aıaqtaldy. Aldaǵy sot otyrystary jabyq túrde ótetin boldy, dep habarlaıdy </span><a style="padding: 0px; margin: 0px; font-size: 18px; font-family: sans-serif;" href="https://kaz.inform.kz/" target="_blank" rel="noopener">QazAqparat tilshisi.</a></p>

Almaty qalalyq sotynyń baspasóz qyzmetinen málim etkendeı, sotqa qatysýshylardyń qaýipsizdigi maqsatynda qylmystyq isti qaraý jabyq formatqa aýystyryldy.

Sottalýshylardyń jalpy sany – 45 adam.

«Olarǵa «Bıligin nemese laýazymdyq ókilettigin asyra paıdalaný» (Qylmystyq kodekstiń 362-baby), uıymdasqan qylmystyq top qurý, oǵan basshylyq etý jáne oǵan qatysý (QK-niń 262-baby), qaraqshylyq shabýyl (QK-niń 191-baby), zańsyz bas bostandyǵynan aıyrý (QK-niń 126-baby), 2022 jylǵy Qańtardaǵy jappaı tártipsizdikterdi uıymdastyrý jáne olarǵa qatysý (QK-niń 272-baby), bandıtızm (QK-niń 268-baby) boıynsha aıyptar taǵyldy», – delingen habarlamada.

Atap ótilgendeı, otyrys barysynda protseske qatysýshylardan sottalýshylarǵa qatysty bultartpaý sharasyn ózgertý jáne joıý, qylmystyq isti qaıtarý jáne toqtatý, jaqyn týystaryn qorǵaýshy retinde taný týraly júzden astam ótinishhat túsken.

«Sondaı-aq is boıynsha 10 jábirlenýshi, 1 kýáger jáne 1 sottalýshy sot otyrysyn jabyq túrde ótkizýdi surady. Olar óz ómirleri, otbasylary men jaqyndarynyń qaýipsizdigi úshin qaýiptenetinin bildirdi. Bul ótinishterdi sot qanaǵattandyrdy», – dep túsindirdi sot ókilderi.

Basty sot otyrysy osy jyldyń 6 qazanyna belgilendi.

Aıta keteıik, máslıhattyń eks-depýtaty Qaırat Qudaıbergen men Arman Jumageldıevke («Dıkıı» Arman) qatysty sot protsesi 14 qyrkúıek kúni Almaty mańyndaǵy №72 túzeý mekemesiniń tergeý ızolıatorynda bastalǵan bolatyn.

Keıin sot protsesine advokattardyń kirýine kedergi keltirilip jatqany týraly aqparat tarady.

«Dıkıı» Arman byltyr Qańtar oqıǵasynan keıin ustalǵan bolatyn. Keıin Bas prokýratýra onyń Ulttyq qaýipsizdik qyzmetiniń tergeý ızolıatorynda otyrǵanyn málim etti.

Al Qaırat Qudaıbergenniń ustalǵany týraly aqparat 2022 jyldyń 22 sáýirinde paıda boldy.

Qaırat Qudaıbergen men «Dıkıı» Armanǵa Qańtar oqıǵasy kezinde adam jınaýdy uıymdastyrdy degen aıyp taǵylyp otyr.