Dıqandar úshin jeńildikpen qarjylandyrýdyń jańa baǵdarlamasy iske qosylady
Alǵash ret «Damý» kásipkerlikti damytý qory» AQ osy baǵdarlama sheńberinde shekteýlerge tap bolǵan fermerler úshin kredıttiń 85% somasyna kepildikter beredi. Mundaı kepildikterdi usyný azyq-túlik qaýipsizdigin edáýir nyǵaıtady jáne ishki naryqtaǵy baǵa turaqtylyǵyn qamtamasyz etedi. Sebebi, «Báıterek» holdınginiń kóktemgi egis jáne egin jınaý jumystaryn qarjylandyrýdyń jalpy kólemi bıyl 440 mlrd teńgege jetpek. Bul baǵytta holdıng agroónerkásiptik keshendi qoldaý úshin naryqtyq resýrstardy barynsha paıdalana otyryp, naryq pen ekinshi deńgeıdegi bankterdiń qarajatyn belsendi túrde aınalymǵa tartady.
Baǵdarlama «Agrarlyq nesıe korporatsııasy» AQ arqyly kóktemgi egis jáne egin jınaý jumystaryn bir jylǵa deıingi merzimge jyldyq 5% sharttarymen qarjylandyrýdy kózdeıdi. Bul bıylǵy sý tasqyny men byltyrǵy qurǵaqshylyq saldarynan qarjylyq qıyndyqtarǵa tap bolǵan fermerlerdi qoldaýǵa baǵyttalǵan.
«Holdıng agroónerkásiptik keshendi belsendi qoldaıdy jáne osy salany qarjylandyrý kólemin turaqty negizde ulǵaıtatyn bolady. Memleket basshysynyń ekonomıkalyq ósý qarqynyn 6%-ǵa deıin ulǵaıtý jáne aýyl sharýashylyǵyn qarjylandyrý kólemin keńeıtý jónindegi tapsyrmasyna sáıkes 2024 jyly AÓK sýbektileri úshin kóktemgi egis jáne egin jınaý jumystaryn jeńildetilgen qarjylandyrýǵa 140 mlrd teńge bólingen. Alaıda, bul soma fermerlerdiń aınalym qarajattaryna degen qajettilikterin qanaǵattandyrý úshin jetkiliksiz boldy. Osyǵan baılanysty biz qosymsha naryqtyq qaryz qarajatyn tartý týraly sheshim qabyldadyq», - dep atap ótti «Báıterek» UBH» AQ Basqarma tóraǵasy Rýstam Karagoıshın.
Baǵdarlamany iske asyrý Holdıngtiń enshiles qurylymdary arqyly keshendi júzege asyrylady, bul resýrstardy agroónerkásiptik sektordyń negizgi aımaqtaryna tikeleı jáne tıimdi baǵyttaýǵa kepildik beredi. Jańa baǵdarlama bıyl 29 sáýirden bastap júzege aspaq.