Dıhanshylardyń nesıelerin óteý merzimin uzartý qajet - QR UKP

ASTANA. QazAqparat - Qazaqstannyń Ulttyq kásipkerler palatasy aýyl sharýashylyǵy taýarlaryn óndirýshilerdiń nesıelerin óteý merzimin uzartýǵa kúsh salmaq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR UKP basqarmasy tóraǵasynyń orynbasary Raqym Oshaqbaev málim etti.

«Biz QazAgrodan», Úkimetten, aýyl sharýashylyǵy mınıstrliginen nesıelerdi óteý merzimin uzartý múmkindigin qarastyrýdy suraımyz. Ol úshin «QazAgronyń» enshiles uıymdary Dırektorlar keńesi deńgeıinde, «QazAgro» Dırektorlar keńesi deńgeıinde merzimin uzartý týraly sheshim qabyldaý qajet», - dedi ol BAQ ókilderiniń saýalyna oraı.

Onyń paıymynsha, Úkimettiń «QazAgro» arqyly bólgen bıýdjettik nesıesin óteýge tıisti aýyl sharýashylyǵy taýaryn óndirýshilerdiń óz mindettemelerin jappaı oryndamaýy múmkin. R.Oshaqbaevtyń sózine qaraǵanda, fermerlerdi nesıelendirýge bıýdjet tarabynan 40 mlrd. teńge bólingen.

«Aǵymdaǵy jyly astyq sapasy tómen ári dymqyl. Sondyqtan da astyq baǵasynyń joǵary bolǵandyǵyna qaramastan aýyl sharýashylyǵy taýarlaryn óndirýshilerdiń bul mindettemelerin der ýaqytyna oryndaýyna qarjylary bolmaýy múmkin», - dedi ol.