Dıhan Qamzabekuly «qańtar qasireti» týraly: Halyq sońǵy málimetten kókeıdegi biraz saýalyna jaýap aldy

NUR-SULTAN. QazAqparat – Osy kúnderi memleket jaýapkershiligi men qoǵam bereke-birligi burynǵydan da úılese túsýi - eldiń aınymas múddesi bolýǵa tıis dep bilemiz. Bul týraly L.N.Gýmılev atyndaǵy EUÝ prorektory, QR UǴA akademıgi Dıhan Qamzabekuly málim etti, dep habarlaıdy QazAqparat tilshisi.

«El tarıhyna «qańtar qasireti» bolyp enetin oqıǵadan bárimiz eseńgirep otyrmyz. Búlingen qalany, ańyraǵan dalany, jazyqsyz jer jastanǵan áskerılerdi, jastardy, tipti beıkúná balaqandardy - alystan emes, óz jerimizden kórdik. Muny túsimizde kórsek te shoshyr edik. Búgin Bas prokýratýra men Densaýlyq saqtaý mınıstrligi adam shyǵyny týraly resmı málimdedi. Ras, qaı el úshin de eń baǵaly qundylyq - adam ómiri. Marqumdardyń aǵaıyndary men jaqyn týystaryna kóńil aıtamyz. Halyq sońǵy málimetten kókeıdegi biraz saýalyna jaýap alǵandaı. Oq tıip mert bolǵandarmen qatar jaralanǵandar sany da anyqtaldy. Jurtty alańdatqan - ustalǵandarǵa qysym kórsetý, adam quqyǵyn buzý faktileri jan-jaqty tekseriletin boldy», - dep jazdy Dıhan Qamzabekuly áleýmettik jelidegi paraqshasynda.

Ǵalymnyń paıymynsha, el bıliginiń «osy máseleni muqııat qaraýda ashyq, jarııa baǵyt ustanamyz» degen sózi qoǵamdy sabyrǵa shaqyrǵandaı.

«Prezıdent Qasym-Jomart Toqaev qasiretten keıingi ońaltý sharalaryn ózi jeke baqylaýda ustaıtynyn málimdedi. Iá, osy kúnderi memleket jaýapkershiligi men qoǵam bereke-birligi burynǵydan da úılese túsýi - eldiń aınymas múddesi bolýǵa tıis dep bilemiz», - dedi QR UǴA akademıgi.

Budan buryn habarlanǵandaı, Bas prokýratýra tártipsizdikter men terrorıstik shabýyldan qaza bolǵandardyń jalpy sanyn atady.

«Adam shyǵyny bolǵan oqıǵalardy tergep, tekserýge erekshe nazar aýdarylýda. Búgingi kúni 4578 jábirlenýshi anyqtaldy. Onyń 4353-i jaralandy. Onyń ishinde 3393 quqyq qorǵaý organdarynyń qyzmetkerleri. Tótenshe jaǵdaı kezinde morgterge qazaq tapqan 225 adam jetkizildi. Olardyń bir bóligi terraktilerge qatysqan, ǵımarattar men quqyq qorǵaý qyzmetkelerine shabýyl jasaǵan qarýly bandıtter. Qaza bolǵandardyń ishinde 19 polıtsııa jáne ásker qyzmetkerleri de bar. Atalǵan derekter aldyn ala sıpatta. Olar áli naqtylanyp jatyr, ózgerýi de múmkin. Degenmen, árbir fakt muqııat tekseriledi, nátıjesi boıynsha quqyqtyq baǵa beriledi», - dedi QR Bas prokýratýrasy qylmystyq qýdalaý qyzmetiniń bastyǵy Serik Shalabaev.

Sonymen qatar Bas prokýratýra oqıǵanyń tolyq hronologııasyn jarııalady.