«Digital agent» qosymshasy arqyly memlekettik qyzmet kórsetý sapasyn baǵalaýǵa bolady

NUR-SULTAN. QazAqparat - Jyl saıyn Memlekettik qyzmet isteri agenttiginiń memlekettik áleýmettik tapsyrysy boıynsha úkimettik emes uıymdar memlekettik qyzmetter kórsetý sapasyna qoǵamdyq monıtorıng júrgizedi. Bul týraly búgin Ortalyq kommýnıkatsııalar qyzmetinde ótken brıfıngte aıtyldy, dep habarlaıdy QazAqparat tilshisi.

«Agenttik jumysynyń mańyzdy basymdyǵy – halyqqa sapaly qyzmet kórsetýdi qamtamasyz etý. Memlekettik kórsetiletin qyzmetterdiń sapasy kórsetiletin qyzmetti alýshylarǵa jappaı saýalnama júrgizý ádisterimen, fokýs-toptardy, qupııa satyp alýshyny, jan-jaqty suhbat ótkizý ádisterimen zertteledi», - deıdi QR Memlekettik qyzmet isteri agenttiginiń tóraıymy Anar Jaıylǵanova.

Memlekettik kórsetiletin qyzmetterdi monıtorıngimen tolyq qamtý, kórsetiletin qyzmetterdiń sapasy týraly obektıvti jáne tolyq kórinisti alý maqsatynda tizilim qyzmetteriniń jáne respondentter sany jyl saıyn ulǵaıýda.

«2019 jyly 65 áleýmettik mańyzy bar jáne problemalyq memlekettik kórsetiletin qyzmetter boıynsha qoǵamdyq monıtorıngini «Zor Rýh» qaıyrymdylyq qory júrgizetin bolady. Onyń barysynda aýyldyq deńgeıge deıin 10 500 qyzmet alýshy qamtylady. Qazirgi ýaqytta agenttik buzýshylyqtardy «postfaktým» monıtorınginen azamattardyń problemalaryn barynsha jedel sheshýge kóshti», - deıdi Anar Jaıylǵanova.

Azamattar «Digital agent» qosymshasy arqyly HQKO, salyq, jumyspen qamtý ortalyqtaryndaǵy memlekettik qyzmet kórsetý sapasyn baǵalaýǵa jáne naqty ýaqyt rejiminde agenttikti habardar etýge múmkindik aldy.

«Búgingi kúni qosymshaǵa HQKO, Arnaıy HQKO, Eńbek jáne halyqty áleýmettik qorǵaý mınıstrligi, Qarjy mınıstrligi aýdandyq deńgeıge deıin qosyldy. Іshki ister jáne Densaýlyq saqtaý mınıstrlikterin, Aqtóbe, Qaraǵandy oblystary, sondaı-aq Nur-sultan, Almaty, Shymkent qalalary ákimdikterin qosymshaǵa tolyqqandy qosý boıynsha jumystar júrgizilýde», - deıdi ol.