Dıas Qadyrbaev pen Azamat Tajaıaqovty Qazaqstanǵa deportatsııalaýy tıis - QR SІM

ASTANA. 9 tamyz. QazAqparat - AQSh-ta Dıas Qadyrbaev pen Azamat Tajaıaqovqa qatysty sot úkimi shyqqannan keıin olardy Qazaqstanǵa deportatsııalaýy tıis. Bul týraly búgingi baspasóz máslıhatynda QR Syrtqy ister mınıstrliginiń baspasóz hatshysy Nurjan Aıtmahanov málim etti.

«Eger olarǵa qatysty naqty sot úkimi shyǵyp, 25 jylǵa bas bostandyǵynan aıyratyn bolsa, onda sottyń sońǵy sózinen keıin olardy Qazaqstanǵa deportatsııalaýy tıis», - dep atap kórsetti N. Aıtmahanov.

Esterińize sala keteıik, Qazaqstan Respýblıkasynyń Nıý-Iorkte ornalasqan Bas konsýldyǵynan túsken aqparatqa sáıkes, keshe, ıaǵnı 8 tamyzda Federaldyq sot alqasy Qazaqstan azamattary Dıas Qadyrbaev jáne Azamat Tajaıaqovqa qatysty aıyp taǵýdy qoldady. Aıyp eki tarmaqtan turady: birinshisi - tergeýge kedergi keltirý maqsatymen aldyn ala kelisim, ekinshisi - tergeýge kedergi jasaý, qylmyskerge kómek kórsetý jáne arańdatýshylyq. Atalǵan aıyptar boıynsha olar 25 jylǵa deıin bas bostandyǵynan aıyrylýy múmkin. Birinshi tarmaq boıynsha 20 jyl berilse, ekinshi tarmaq 5 jyldy kózdeıdi. «Sondaı-aq jazany ótegennen keıin olar baqylaýǵa alynyp, 250 myń AQSh dollary kóleminde aıyppul tólep berýi tıis. 13 tamyzda kezekti sot otyrysy ótedi», - deıdi N. Aıtmahanov.