Devıd O'Sallıvan: Úshinshi elderge emes, naqty kompanııalarǵa sanktsııa salýymyz múmkin

ASTANA. QazAqparat – Eýropalyq Odaqtyń sanktsııalar jónindegi arnaıy ókili Devıd O'Sallıvan Qazaqstannyń Reseı-Ýkraına jaǵdaıyna baılanysty janama sanktsııaǵa iligý yqtımaldyǵy týraly pikir bildirdi, dep habarlaıdy QazAqparat tilshisi.

«Biz úshinshi elderge sanktsııa salmaımyz. Shetin jaǵdaılarda belgili bir kompanııalarǵa olardyń sanktsııany aınalyp ótýge kómekteskeni dáleldense, sanktsııa salýymyz múmkin. Qazirgi tańda qolymyzda jetkilikti egeı-tegjeıli málimet joq. Ondaı aqparat bolǵanda qandaı da bir kompanııa sanktsııany aınalyp ótýge shynymen de kómektesip júr me, sony anyqtaı alar edik. Qazir biz qolymyzda bar materıaldardyń bárin tekserip jatyrmyz. Qazirgi eń negizgi maqsatymyz – naqty, senimdi aqparat alý. Bul baǵytta Qazaqstan bıligimen birge jumys istep jatyrmyz», - dedi ol Eýropalyq Odaqtyń Astanadaǵy ókildiginiń keńsesinde ótken baspasóz konferentsııasynda.

Sondaı-aq, ol qazirgi geosaıası jaǵdaıdaǵy ár eldiń áreketi erteńgi repýtatsııasyn anyqtaıtynyn aıtty.

«Eýropa elderine qosylmaǵan, biraq G-7 elderimen áriptestikti jalǵastyrǵysy keletin elderge kelsek, bul – repýtatsııa máselesi. Eger qandaı da bir eldiń sanktsııalardy aınalyp ótýge tuǵyr bolyp otyrǵany dáleldense, bul ózge kompanııalar úshin salqyn qatynas áserin týyndatýy múmkin. Kompanııalar mundaı eldiń kompanııalarymen istes bolýǵa asa qulyqty bolmaıdy. Óıtkeni, ózderi sanktsııaǵa túsip qalýy múmkin jáne ol týraly jaqsy biledi», - dedi arnaıy ókil.