Deutsche Bank 7 myń jumysshysyn bosatpaq

BRıÝSSELЬ. QazAqparat - Deutsche Bank qaıta qurylymdaý baǵdarlamasy aıasynda 7 myńnan astam jumys ornyn qysqartýdy josparlap otyr. Bul týraly bank beısenbi kúni málim etti, dep habarlaıdy «QazAqparat» HAA tilshisi.

«Deutsche Bank shyǵyndardy azaıtý qarqynyn jyldamdatady. Osyǵan baılanysty, shtattyq laýazymdar sany qysqarady. Qazir olardyń jalpy sany  97 myńnan astam. Al qysqartýdan keıin 90 myńnan az bolady», - dep málimdedi Germanııanyń eń iri banki.

Banktiń jańa basshysy Krıstıan Zevıng bıznesti túbegeıdi qaıta uıymdastyrýdy josparlap otyr. Ol sáýir aıynda basqarma tóraǵasy laýazymyna saılanǵan bolatyn.

Baǵaly qaǵazdardyń saýdasymen aınalysatyn bólimdegi jumys oryndarynyń 25%-y qysqarady. Bank elektrondy qyzmet júrgizýge basymdyq bergeli otyr.