Detektıvterge azamattardyń jeke derekteri qoljetimdi bola ma

<p>ASTANA. KAZINFORM &ndash; Qazaqstanda jeke detektıvterdiń qyzmeti týraly arnaıy zań jobasy ázirlenip jatyr. Onyń aıasynda jeke detektıvterdiń azamattardyń jeke málimetterin alyp, tanysýǵa quqyǵy bar ma? Bul saýalǵa Parlamentarızm ınstıtýtynyń sarapshysy Nurtaı Imanǵalıev jaýap berdi.</p>

«Jeke detektıvter Qazaqstan Respýblıkasynyń Konstıtýtsııasy, sodan soń ázirlenip jatqan «Jeke detektıvtik qyzmet týraly» Qazaqstan Respýblıkasy zańynyń jobasy men basqa da normalar, aktilerdi qatań saqtaýy tıis. Bul zań jobasyna ózgerister engizilýi múmkin», - dedi Nurtaı Imanǵalıev elordada «Qazaqstandaǵy jeke detektıvtik qyzmetti zańnamalyq retteýdiń problemalyq máseleleri men perspektıvalary» taqyrybynda ótken dóńgelek ústel barysynda.

Sarapshynyń málimetinshe, zań jobasy ázirge 5 taraýdan, 25 baptan turady.

«Jeke detektıvterdiń qyzmeti aqyly, ol kelisimshart jasaý arqyly sheshiledi. Árıne, jeke detektıvterge lıtsenzııa beriledi jáne olar úshin azamattardyń jeke derekterine qoljetimdi bolýy múmkin», - deıdi ol.

Buǵan deıin Nurtaı Imanǵalıev jeke detektıvterge qoıylatyn talaptarmen tanystyrǵan edi.

Aıta keteıik, Qazaqstanda jeke detektıvterdiń qyzmetin retteý maqsatynda arnaıy zań jobasy ázirlenip jatyr. 

Osy oraıda búgin Astanada QR Prezıdenti isi basqarmasy janyndaǵy Parlamentarızm ınstıtýty «AMANAT» partııasynyń qoǵamdyq saıasat ınstıtýtymen birlesip uıymdastyrǵan «Qazaqstandaǵy jeke detektıvtik qyzmetti zańnamalyq retteýdiń problemalyq máseleleri men perspektıvalary» taqyrybynda dóńgelek ústel ótti.

Atalǵan sharaǵa Senat jáne Májilis depýtattary, Parlamentarızm ınstıtýtynyń ǵalymdary men sarapshylary qatysty.