Destrýktıvti kúshter birneshe ret turaqtylyqty buzýǵa talpyndy - Qasym-Jomart Toqaev

NUR-SULTAN. QazAqparat – Destrýktıvti kúshter birneshe ret turaqtylyqty buzýǵa talpyndy. Bul týraly UQShU Ujymdyq qaýipsizdik keńesiniń kezekten tys sessııasynda QR Prezıdenti Qasym-Jomart Toqaev málim etti, dep habarlaıdy QazAqparat tilshisi.

Memleket basshysy destrýktıvti kúshter birneshe ret turaqtylyqty buzyp, tártipsizdik ornatýǵa áreket etkenin atap ótti.

«Memlekettiń turaqtylyǵy men qýattylyǵyna áldebir testileý júrgizildi. Bul is-qımyldardyń barlyǵyna tosqaýyl qoıyldy. Alaıda uıymdastyrýshylar ózderiniń josparlaryn keıinge qaldyrmaı, qarýly qylmystardy daıarlaýǵa kóshti. Olar sebep retinde birqatar óńirde avtomobıl gazyna baǵanyń ósimine halyqtyń narazylyǵyn paıdalandy. Mıtıngiler ótip, olardyń qatysýshylary áleýmettik-ekonomıkalyq jáne qoǵamdyq-saıası talaptardy jarııalady. Olardyń barlyǵy estildi jáne memleket tarapynan oryndaldy», - dedi QR Prezıdenti.

Aıta keteıik, búgin UQShU Ujymdyq qaýipsizdik keńesiniń kezekten tys sessııasy ótip jatyr. Jıyn Qazaqstan tarapynyń bastamasymen shaqyryldy.

Eske salaıyq, QR Prezıdenti Qasym-Jomart Toqaev UQShU múshe elderdiń basshylarynan el aýmaǵyndaǵy terrorıstik qaýipti eńserý úshin Qazaqstanǵa kómek kórsetýdi suraǵan bolatyn.