Desanttyq shabýyldaý áskerleriniń alpınıstik rotalary alǵashqy dalalyq jattyǵýlaryn aıaqtady

<p><strong>ASTANA. KAZINFIRM &mdash; Birneshe aı buryn Desanttyq-shabýyldaý áskerleriniń quramalarynda taý bólimsheleri qurylǵan bolatyn. Onyń qajettiligi el aýmaǵynyń on paıyzyn &laquo;alpınıstik&raquo; rotalar jaýyngerlik mindetter oryndaıtyn taý jotalary quraıtynynan bolyp otyr.&nbsp;</strong></p>

«Kóktal» oqý polıgonyndaǵy dalalyq is-sharalarda tájirıbeli nusqaýshylar, onyń ishinde belgili alpınıst halyqaralyq dárejedegi sport sheberi, birneshe dúrkin júldeger, TMD jáne Qazaqstan Respýblıkasynyń joǵary synypty chempıony Maqsut Jumaev jeke quramdy taýly jerde kúrdeli jaǵdaıda taktıkalyq tásilder men jaýyngerlik is-qımyldy oryndaýǵa úıretti. 

Maqsut Jumaev — Qazaqstannyń eń tanymal alpınısteriniń biri. Ol 2011 jyly Vasılıı Pıvtsovpen birge «Álemdegi eń bıik 14 shyń» baǵdarlamasyn oryndaǵan. Mundaı «Gımalaı tájiniń» ıegerleri álemde sanaýly ǵana.

Foto: QR Qorǵanys mınıstrligi

Desantshylar, ásirese alpınıster ataqty nusqaýshynyń sabaqtaryn zeıin qoıa tyńdady.

— Onkúndik jıyn barysynda taý daıyndyǵy rotalarynyń áskerı qyzmetshilerine teorııalyq jáne praktıkalyq sabaqtar ótkizildi. Negizgi nazar taý relefiniń formalaryn, taýdaǵy qaýipsizdik sharalaryn, taý daıyndyǵynda qoldanylatyn saqtyq ádisterin jáne taý jaǵdaıynda ómir súrý sabaqtaryn zerdeleýge aýdaryldy. Alǵashqy járdem kórsetý, ózine-ózi kómek kórsetý jáne jaralylardy tasymaldaý negizderine erekshe nazar aýdaryldy, - dedi Desanttyq-shabýyldaý áskerleri shtab bastyǵynyń orynbasary polkovnık Aqzam Berdenov.

Áskerı qyzmetshiler taýdaǵy ártúrli kedergilerdi eńserý kezinde toraptardy toqý, saqtandyrý jáne ózin-ózi saqtandyrýdy uıymdastyrý, arqan bekitý jáne ony kóterilý men túsý kezinde qoldaný tásilderin ıgerdi. 

Foto: QR Qorǵanys mınıstrligi

Alpınısterge jartasty relefti eńserý tehnıkasy, kertpeler, terrassalar, karnızder jáne jartas taqtalary boıynsha qozǵalys úıretildi. Sondaı-aq jergilikti jerdi baǵdarlaý, taýdaǵy azımýt boıynsha qozǵalys jáne taý ózeni arqyly ótýdi uıymdastyrý júzege asty.

Kýrstyń teorııalyq jáne praktıkalyq pánderi boıynsha synaqtardy sátti tapsyrǵan áskerı qyzmetshilerge alpınızm jáne taý daıyndyǵy boıynsha bazalyq razrıad beriledi.