Derjavınsk pen Ereımentaýda sý qubyry men káriz toraptary jańartylady

ASTANA. QazAqparat – Aqmola oblysynyń ákimi Ermek Marjyqpaev halyqty sapaly aýyz sýmen qamtý úshin qandaı jumystar josparlanǵanyn aıtyp berdi, dep habarlaıdy QazAqparat tilshisi.

«Qazirgi ýaqytta oblystaǵy 589 aýyl ishinen 381 aýylda ortalyqtan sýmen jabdyqtaý júıesi bar, 38 aýylda – qurastyrylǵan blok-modýlder ornatylǵan. 154 aýylda – ortalyqtandyrylmaǵan sýmen jabdyqtaý bolsa, 16 aýyl tasymaldanatyn sýdy paıdalanady», - dedi oblys ákimi ortalyq kommýnıkatsııalar qyzmetinde ótken brıfıngide.

Spıkerdiń aıtýynsha, qazirgi ýaqytta sýmen jabdyqtaý qyzmetterine qoljetimdilik qalalarda - 95,3%, aýyldyq eldi mekenderde – 89,8%.

«Jyl sońyna deıin 31 aýylda jáne 2 qalada (Derjavınsk, Ereımentaý) aýyz sý sapasyn jaqsartý, 390 shaqyrym sý qubyry men káriz toraptaryn salý jáne rekonstrýktsııalaý josparlanýda. Ol 12 myńnan astam halyq mekendeıtin 20 aýylda ortalyqtan sýmen jabdyqtaý qyzmetine qoljetimdilikti arttyrady. Keshendi blok-modýlder ornatý arqyly 15 eldi mekende qosymsha 2,6 myń adamdy sapaly aýyz sýymen qamtamasyz etý josparlanyp otyr», - dedi E. Marjyqpaev.

Sonymen birge, Şýche-Býrabaı kýrort aımaǵynda ekologııalyq máselelerdi sheshý aıasynda 15 mlrd teńgeden astam somaǵa 7 joba júzege asyp jatyr.

Bul jobalar Şýche qalasynda, Býrabaı men Qatarkól kentterinde, sondaı-aq kýrorttyq aımaqtaǵy shıpajaılar men saýyqtyrý oryndarynda ortalyqtan sýmen jabdyqtaý jáne sý burý máselesin tolyq sheshýge múmkindik beredi.

Jalpy 2025 jylǵa qaraı sapaly sýmen 100% jabdyqtaý úshin 65 aýylda ortalyqtandyrylǵan sýmen jabdyqtaý qurylysy josparlanǵan.

Onyń ishinde 34 aýyl úshin jobalyq-smetalyq qujattama ázirlendi, onyń 31-i ázirleý satysynda.

Al 105 aýylda sý tazartýdyń keshendi blok-modýlderin ornatý nemese uńǵymalardy burǵylap, súzgiler ornatý jumystary júrýde.