Dertime shıpa, janyma qýat bergen dárigerlerge alǵys aıtamyn- Jazıra Toqtar

KÓKShETAÝ. QazAqparat – QR Memlekettik qyzmet isteri agenttigi Aqmola oblysy boıynsha departamentiniń mamany Jazıra Toqtar dertine shıpa, janyna qýat bergen Kókshetaý qalalyq kópbeıindi aýrýhanasynyń qyzmetkerlerine alǵys bildirdi, dep habarlaıdy QazAqparat tilshisi.

«Dert meńdep, daýa izdegende dárigerge júginetinimiz anyq. Iá, aýrý azabyn tartqan sátte ajalǵa arasha bolatyn aq halatty jandardyń eńbegi ólsheýsiz ǵoı. Mundaıda ýaıym keshken júrekke sabyr syılaıtyn, kúdikti seıiltip, úmitti qaıta jandyryp, aýrýdan aıyqtyrý úshin bar kúsh-jigerin aıamaıtyn qoly altyn, júregi nurly aq jeleńdi abzal jandarǵa qandaı maqtaý sóz aıtsańyz da artyq etpeıdi. «Qazaqta «Jaqsynyń jaqsylyǵyn aıt, nury tasysyn» degen ataly sóz bar. Osy rette «Alǵys aıtý kúni – beıbitshilik pen kelisimniń kórinisine aınalǵan jarqyn merekede eń aldymen dertime shıpa, janyma qýat bergen Kókshetaý qalalyq kópbeıindi aýrýhanasynyń gınekologııalyq bólimshesiniń meńgerýshisi Ásel Ýahıtovaǵa jáne bólimsheniń barlyq medıtsınalyq qyzmetkerlerine olardyń sezimtaldyǵy, kásibıligi men tilektestigi úshin zor alǵysymdy bildiremin», - deıdi Jazıra Toqtar.

Keıipkerimizdiń aıtýynsha, jýyrda oǵan ish qýysyndaǵy qaterli isikti joıý boıynsha ota jasalǵan. Mamandardyń kásibı sheberligi men biliktiliginiń arqasynda ota sátti ótken.

«Dárigerlerdiń barlyǵy óz isiniń maıtalman sheberleri. Uıymdastyrýshylyq pen jaýapkerlikteri joǵary deńgeıde. Qyzmetkerler naýqastarǵa ózderiniń týǵan balasyndaı qaraıdy. Jas pen kárige, jalpy adamzattyń bárine meıirimmen qaraıtyn, ózgeniń ómiri úshin kúresip, kóńil shýaǵyn syılaıtyn dárigerlerdiń jyly sózderinen aq ózińdi úıde ata-anańnyń qasynda júrgendeı sezinesiń», - dep qosty keıipkerimiz.

Sonymen birge, ol naýqastanyp qalǵan kúni alǵashqy medıtsınalyq kómek kórsetken jedel járdem brıgadasyna, aýyrsyný sındromyn jeńýge kómektesip, óte qajet bolǵan kezde psıhologııalyq qoldaý kórsetken Kókshetaý qalalyq kópbeıindi aýrýhanasynyń qabyldaý bóliminiń dárigeri Nurlan Jumataevqa, sondaı-aq, otany josparlaýǵa jáne tekserýden ótýge kómektesken Otbasylyq densaýlyq ortalyǵynyń ýchaskelik dárigeri Álııa Qanapovaǵa sheksiz alǵysyn bildirýde.

«Sizder kún saıyn kóptegen adamdardyń ómirlerine arasha túsip kelesizder. Sizderdiń jasap jatqan jaqsylyqtaryńyz eki eselenip qaıtsyn. ýdesizder. Barlyqtaryńyzǵa zor densaýlyq, amandyq jáne kásibı tabys tileımin», - dep túıindedi Jazıra Toqtar.