Derektaný ǵylymyn damytý qajet - Myrzataı Joldasbekov
«Qazaqstan Prezıdenti Nursultan Nazarbaevtyń «Uly dalanyń jeti qyry» eńbegindegi ınnovatsııalyq tujyrymdamalar» taqyrybynda ótken dóńgelek ústelde Myrzataı Joldasbekov ult tarıhyn túgendeý úshin qandaı eńbek atqarylyp jatqanyn aıtty. Dóńgelek ústel QR BǴM Memleket tarıhy ınstıtýtynyń uıymdastyrýymen Astanada ótip jatyr.
«Elbasymen taıaýda men de kezdestim. Sonda Elbasy «maqalany oqydyńyzdar, endigi kezekte ne istep jatyrsyzdar?» dep surady. Men ne istep jatqanymdy sizderge aıtyp óteıin. Bizde derektaný ǵylymy damymaı qalǵan. «Anaý aıtty nemese mynaý aıtty» deı beremiz. Tarıhtyń bárin de aınalyp kelgende jasaıtyn - ózimiz, ıaǵnı halyq. Shejirege súıengenimizben, naqty derekterge basa mańyz berýimiz kerek. Burynǵy tarıhtan aıyrylyp qala jazdadyq. Endi jylap kórisip jatyrmyz. Kezinde Elbasyna táýelsizdik dáýirinde memlekettiń shejiresin jasamaımyz ba degen edim. Memleket basshysy sol kezde qoldaý bildirip, 14 tomyn shyǵaryp, tusaýkeserin ótkizgen edik. Aqyry onyń elý tomyn da shyǵardyq», - deıdi Myrzataı Joldasbekov.
Myrzataı Joldasbekov óz sózinde Ashhabadqa barǵan saparyn eske aldy.
«Ol jaqta keremet bir sýret salynypty. Mýzeıdiń janynda «Kúltegin túrikmen», «Tonykók túrikmen» - bári de túrikmen ekeni jazylǵan. Men onysyn qyzǵanǵanym da joq, jazǵany da durys shyǵar, biraq «áttegen-aı, biz osyny aıta almaı otyr ekenbiz ǵoı» dep oıladym. Óıtkeni, kezinde Maǵjan aqynnyń ózi de qarashańyraq qazaqqa qalǵanyn aıtqan ǵoı. Men, máselen, sonaý jetinshi ǵasyrdaǵy Orhon eskertkishterin zerttegen adammyn. Osy ýaqytqa deıin bir adam bul sózime qarsy kelgen joq: óıtkeni, onyń (joǵaryda atalǵan tarıhı tulǵalardyń - avt.) bári de qazaq. Sol kezdiń ózinde «artyq aıtyp otyrsyń» degen akademık aǵalarymyz boldy», - deıdi qoǵam qaıratkeri.
Myrzataı Joldasbekov óz sózinde Qorqyt atadan qalǵan, on úshinshi ǵasyrda jazylǵan kitap baryn atap ótti. Onyń bir nusqasy Vatıkan kitaphanasynda, ekinshisi Drezden kitaphanasynda saqtalǵan.
«Drezden kitaphanasynda saqtalǵan nusqasy qypshaq tilinde jazylǵan. Ony aldymen orystar, odan keıin túrikter, ázerbaıjandar men túrikmender aýdarǵan. Qazaqsha da aýdarylǵan. Biraq, ol aýdarma orys tilindegi aýdarmadan kóshirilgenin atap ótý kerek. Sondyqtan, men qazir Qorqyt ata kitabyn (tikeleı - avt.) aýdaryp jatyrmyn. Bıyl aıaqtaımyn degen oıdamyn», - dedi Myrzataı Joldasbekov.