Derbes bilim berý uıymdaryna salyq jeńildikteri qarastyrylady

ASTANA. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine derbes bilim berý uıymdarynyń qyzmetin retteý máseleleri boıynsha ózgerister men tolyqtyrýlar engizý týraly» zań jobasy tanystyryldy.

Bilim jáne ǵylym vıtse-mınıstri Tahır Balyqbaevtyń aıtýynsha, zań jobasy eki maqsatty kózdeıdi. «Birinshiden, derbes bilim berý uıymdaryn akademııalyq basqarý júıesin jetildire túsý. Bul rette olardyń jumysynyń sapasy da qamtamasyz etiledi. Ekinshiden, Nazarbaev Ýnıversıtetiniń ınnovatsııalyq klaster qyzmetin uıymdastyrý máseleleri kózdelip otyr», - dedi Tahır Balyqbaev.

Onyń aıtýyna qaraǵanda, zań jobasymen usynylǵan túzetýler derbes bilim berý uıymdarynyń qyzmeti úshin salyqtyq jeńildikterdi qoldanýdy ońaılatady. «Máselen, bilim berýdiń derbes uıymdary óziniń jeke qarajatynan talantty oqýshylarynyń halyqaralyq olımpıadalar men semınarlarǵa qatysýyn qamtamasyz etip, shyǵyndaryn ózderi kóteretin bolady. Esesine sol soma oqýshylardyń janama tabystary retinde qarastyrylmaıdy, osy arqyly ondaı qarajatqa jeke tabys salyqtary alynbaıtyn bolady», - dedi vıtse-mınıstr.

Bul rette derbes bilim berý uıymdary - Nazarbaev Ýnıversıtet pen Nazarbaev zııatkerlik mektepteri ilki joba, synaq alańdary retinde qarastyrylyp otyr. Sondyqtan da, bul jobalardy júzege asyrý barysynda atalǵan nysandarda jınaqtalǵan ońtaıly tájirıbeler aldaǵy ýaqytta bilim berý júıesin damytý kezeńderinde qoldanylýy múmkin.