Depýtattyqqa jastar men bilikti mamandardyń kelýine jaǵdaı jasaldy – Elbasy
«Bıyl elimizdiń Táýelsizdik alǵanyna 30 jyl tolady. Osy oraıda kóp jumystar jasalady. Ózderińiz bilesizder, óte aýqymdy úgit-nasıhat jumystary júrgizildi. Depýtattardyń arasyna jańa adamdar men jastar, áıelder, bilikti mamandar kelsin degen nıetpen aldyn ala tańdaý jasalyp, praımerız boldy. Saılaý tek daýys berý ǵana emes, ol elimizdiń bolashaǵyna baılanysty. Qazaq eliniń, Otanymyzdyń bolashaǵy men úmiti, múddesi bir. Bizdiń qanymyz da, janymyz da, jerimiz de bir. Sondyqtan álem aldynda taǵy da bir birligimizdi kórsetý kerek», - dedi QR Tuńǵysh Prezıdenti.
Osy oraıda N. Nazarbaev bul saılaýda el bolashaǵy men birligi úshin, elimizdiń tynyshtyǵy úshin daýys beretinin atap ótti.
«Sondyqtan daýys berýge kelmegen azamattardy saılaý ýchaskesine kelip, óziniń azamattyq ári konstıtýtsııalyq quqyǵyn oryndaýǵa shaqyramyn», - dedi Elbasy.
Eske sala ketsek, búgin Qazaqstan aýmaǵynda qurylǵan barlyq saılaý ýchaskesinde daýys berý júrip jatyr.
Depýtattardy saılaý boıynsha daýys berý Qazaqstan Respýblıkasynyń aýmaǵynda jáne odan tysqary jerde qurylǵan 10 060 saılaý ýchaskesinde júrgizilip otyr. Saılaý komıssııalary daýys berý orny men ýaqyty týraly der ýaqytynda aqparat berdi. Elorda ýaqytymen saǵat 08.00-de jaǵdaı boıynsha elimizdegi 9 994 saılaý ýchaskesinde jáne shet memleketterdegi qazaqstan ókildikteri janyndaǵy 17 saılaý ýchaskesinde daýys berý bastaldy.
Konstıtýtsııalyq merzimge saı ótip jatqan Májilis saılaýyna elimizde tirkelgen 5 saıası partııa, atap aıtqanda, «Aýyl» halyqtyq-demokratııalyq patrıottyq partııasy, «Nur Otan» partııasy, «ADAL» saıası partııasy, Qazaqstannyń «Aq jol» demokratııalyq partııasy, «Qazaqstannyń Halyq partııasy» depýtattyq mandattan úmitti.