Depýtattardyń bıýdjetke qatysty usynymdary Úkimet jumysynda eskeriledi - mınıstr

NUR-SULTAN. QazAqparat – Byltyr áleýmettik jáne basqa da mindettemeler tolyq kólemde oryndaldy. Bul týraly Parlament palatalarynyń birlesken otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstrdiń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Úkimettiń esebi Parlament Májilisi men Senatynda egjeı-tegjeıli talqylandy. Ony qaraý kezinde ekonomıkanyń barlyq baǵyttary boıynsha júzdegen suraqtar men usynystar berildi. Olar jumys toptary men komıtetterde de talqylandy. Depýtattardyń usynymdary Úkimet jumysynda eskeriletin bolady.

2021 jyly Jalpy ishki ónimniń ósimi 4 paıyzdy qurady. Ekonomıkanyń barlyq negizgi salalarynda oń nátıje boldy. Máselen, ónerkásiptik óndiris kólemi 3,8 paıyzǵa, qurylys salasy 7,6 paıyzǵa, kólik 3,6 paıyzǵa, saýda 9,2 payzǵa ósti. Negizgi kapıtalǵa salynǵan ınvestıtsııalar kólemi 3,5 paıyzǵa ulǵaıdy», - dedi E. Jamaýbaev.

Sonymen qatar ol byltyr ınflıatsııa 8,4 paıyzdy quraǵanyn eske saldy. Jumyssyzdyq 4,9% deńgeıinde saqtaldy.