Depýtattar jedel járdem qyzmetkerlerin qorǵaýdyń qosymsha tetikterin engizýdi usyndy

<p>ASTANA. KAZINFORM &ndash; Senator Amangeldi Tolamısov medıtsına qyzmetkerlerin qorǵaýdy kúsheıtýdiń mańyzy týraly aıtty. Oǵan Qaraǵandyda belgisiz adamnyń jedel járdem júrgizýshisin uryp-soqany týraly áleýmettik jelide keńinen jarııalanǵan óreskel jaǵdaı sebep boldy.</p>

Sondyqtan birqatar senator osy másele boıynsha Premer-Mınıstrdiń orynbasary Tamara Dúısenovanyń atyna depýtattyq saýal joldady.

«Áleýmettik jelide belgisiz er adamnyń jedel járdem júrgizýshisine dóreki sóılep, soqqyǵa jyqqan vıdeosy tarady. Naýqastyń ómirine arasha túsken jedel toptyń ózine de kómek kerek boldy. Shuǵyl dárigerlik kómek kútken bir jastaǵy sábı de ekinshi brıgadanyń kelýin kútti. ıAǵnı, quqyq buzǵan turǵyn eki adamnyń da ómirine qaýip tóndirdi. Osyndaı jaǵdaılar osyǵan deıin de birneshe ret oryn alǵan. Medıtsına qyzmetkerleri kúndelikti qanshama adamnyń ómirine arasha bolyp jatqanda, ózderiniń ómiri men densaýlyǵyna da qaýip qaıdan kelerin bilmeıdi», - dedi A. Tolamısov.

Depýtat dárigerlerge qastandyq jasap, olarǵa kúsh kórsetetinderge nemese qater tóndiretinderge jazany qatańdatý qajet dep sanaıdy. 

«Medıtsına qyzmetkerleriniń qyzmetine kedergi keltirilmeýi úshin olardyń mártebesi qorǵanys jáne ishki ister salasy qyzmetkerlerimen teńestirilýi kerek. Jedel járdem kólikterin regıstratorlarmen jabdyqtaý mańyzdy jáne medıtsınalyq mekemelerdegi aq halatty abzal jandardyń, emdelýshilerdiń qaýipsizdigin qamtamasyz etý úshin keshendi jospar qabyldanýy tıis. Medıtsına qyzmetkerleriniń óz qyzmettik mindetterin oryndaý barysynda densaýlyǵy men ómirine qaýip tóndiretin quqyq buzýshylyqtar úshin arnaıy jaza taǵaıyndaý maqsatynda zańdyq normalar qabyldaýdy suraımyz», - dedi Tolamısov.