Depýtattar jaıylym týraly zańdy qaraıdy

<p>ASTANA. KAZINFORM &mdash; Senat Spıkeri Máýlen Áshimbaev palata bıýrosynyń otyrysyn ótkizdi. Onda depýtattar 15 aqpan kúni bolatyn Senat otyrysynyń kún tártibin talqylap, bekitti.</p>

Soǵan sáıkes aldaǵy beısenbide senatorlar «QR keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» zańdy qaraıdy. Ol jaıylymdardy basqarý jáne paıdalaný salasyndaǵy qoldanystaǵy zańnamany jetildirýdi kózdeıdi.

Atap aıtqanda, depýtattar bastamashy bolǵan zańda halyqtyń qajettiligine arnalǵan jaıylymdyq jerlerdi aýyl sharýashylyǵy alqaptarynyń basqa túrlerine aýystyrýǵa tyıym salatyn normalar qarastyrylǵan.

Sonymen qatar palata otyrysynda senatorlardyń «Qazaqstan temir joly» ulttyq kompanııasy» aktsıonerlik qoǵamynyń qyzmeti týraly depýtattyq saýaly boıynsha Kólik mınıstri Marat Qarabaevtyń aýyzsha jaýaby tyńdalady.

Senat Tóraǵasy Memleket basshysy Úkimettiń keńeıtilgen otyrysynda elimizdiń kólik-logıstıkalyq áleýetin arttyrý strategııalyq mindet dep belgilep bergenin atap ótti. Osyǵan baılanysty palata otyrysynda azamattar men kásipkerler jıi kóterip júrgen jolaýshylar tasymaly, júk tasymaly, tarıftik saıasat jáne taǵy basqa mańyzdy máselelerge basa mán beriledi.