Depýtattar sheteldik kólikterdi zańdastyrý ýaqytyn uzartýdy usyndy
«2022 jyly 1 qyrqúıekte Memleket basshysy Qasym-Jomart Toqaev óz Joldaýynda elimizge zańsyz kirgen avtokólikterdi tirkeý týraly birjolǵy sheshim jasaýdy usyndy. 2023 jyly Úkimet Qaýlysymen 2022 jyly 1 qyrkúıekke deıin el aýmaǵyna ákelingen kólikterdiń jekelegen sanattaryn bastapqy tirkegeni úshin alym mólsherlemesi men ýtılızatsııalyq alymyn 200 myń teńge kóleminde bekitti. Oǵan qosa kólik basqa memlekettiń izdeýinde bolmaýy jáne kedendik tazalaýdan ótýi shart boldy. Qazir bizdiń kóterip otyrǵan máselemiz el aýmaǵyna 2022 jyldyń 1 qyrkúıeginen keıin kirgen 80 myńǵa jýyq kóliktiń taǵdyry jaıynda bolmaq», - dedi depýtat Naýryz Saılaýbaı Májilistiń búgingi otyrysynda.
Onyń aıtýynsha, halyq sheteldik mashınalardy jyly jańa, sapasy joǵary, baǵasy da tıimdi bolǵandyqtan jappaı alyp jatyr.
«Ózderińiz biletindeı, bizdiń elde 30 jyl júrgen eski kóliktiń baǵalary sharyqtap tur. Mysaly, 2-3 jyl buryn «Toyota Camry 20» avtokóligi 2 mln teńge tursa, qazir 4 mln teńgege jetti. Sebebi satyp alǵan eski kóliktiń baǵasy jyl saıyn qymbattaýda. Al ózimizden qurastyrylyp shyqqan avtokólikter qarapaıym turǵyndarǵa qoljetimsiz, baǵasy sapasyna saı kelmeıdi. Shetelden resmı túrde satyp alaıyn dese ýtılızatsııalyq alym men bastapqy tirkeý alymy kólik baǵasynan da asyp jatyr. Sondyqtan azamattarymyz áli kúnge deıin kórshi elderden kólikterdi kirgizip jatyr. Olardyń sany kún saıyn artyp, aldaǵy ýaqytta taǵy úlken máselege ákep soǵýy ábden múmkin», - dedi N. Saılaýbaı.
Osyǵan baılanysty Naýryz Saılaýbaı Premer-Mınıstrdiń birinshi orynbasary Roman Sklıarǵa saýal joldady.
«2022 jyldyń 1 qyrkúıeginen keıin shetelde tirkelgen kólikterdi aıdaǵan Qazaqstan azamattaryna elimizdiń shekarasyna kirýge nege ruqsat berildi? Prezıdent joldaýynda zańsyz kólik ákeletin amal-tásildiń bárine tosqaýyl qoıý úshin batyl sharalar qabyldaý qajet dedi. Sizderdiń tarapyńyzdan tosqaýyl qoıý úshin qandaı sharalar qabyldandy? Shekaramyzdan ótken shetelde tirkelgen avtokólikterdiń qanshasy memlekettik tirkeýden óte almady jáne olardyń taǵdyry ne bolmaq?», - dep surady depýtat.
Sonymen qatar Jalpyulttyq sotsıal-demokratııalyq partııasy shetelde tirkelgen kólikterdi zańdastyrý ýaqytyn, shekaramyzdan zańsyz kiretin kólikterdi ótkizbeýdiń amaldaryn taýyp, naqty sharttaryn bekitkenshe uzartýdy usyndy.
«Joǵaryda atalǵan máseleni eskere otyryp, bul kólik ıeleriniń arasynda jalǵyz basty analar, kópbalaly jáne múmkindigi shekteýli bala asyrap otyrǵan otbasylar, múmkindigi shekteýli jandar men jasy 35-ke deıingi jastar bar ekenin eskere otyryńyzdar», - deıdi JSDP ókili.