Depýtattar sapasyz lıft qyzmeti úshin jaýapkershilikti kúsheıtýdi usyndy
«Barsha elimizdegi úı lıftteriniń qyzmet kórsetýi salasynda oryn alǵan qaıǵyly oqıǵalarǵa nazar aýdarǵymyz keledi. Astanada sońǵy 5 aıda lıftiniń qulaýy boıynsha 3 oqıǵa tirkeldi. Adamdar áýpirimdep aman qaldy, biraq fızıkalyq jáne moraldik zaqym aldy. Sońǵy jylda elordada lıft qoldanysyndaǵy aqaýlarǵa qatysty 30-dan astam oqıǵa tirkelgen. Elimizdiń ózge qalalarynda da lıft máselesi ózekti kúıinde qalyp otyr», - dep atap ótken Shakır Hahazov palatanyń plenarly otyrysynda QR Premer-Mınıstri Baqytjan Saǵyntaevtyń atyna saýal joldady.
Depýtattyń aıtýynsha, sońǵy bir aıda Pavlodarda 25-ten astam apat qaýpi týyndaǵan, Oralda alty jylda 7 lıft qana aýystyrylǵan, Almatyda lıft mehanızmderiniń 70% aýystyrýdy qajet etedi.
«Shymkentte de jaǵdaı máz emes - lıftterdiń 80% jýyǵynyń paıdalaný merzimi 25 jyldan asyp ketken jáne qaıǵyly oqıǵa bolmaıynsha jumysyn jalǵastyra bermek. Statıstıkaǵa sáıkes, respýblıkanyń turǵyn úı salasynda shamamen 6 000 lıfttiń qoldaný merzimi ótip ketken jáne shuǵyl aýystyrýdy qajet etedi. Sonymen qatar, úı turǵyndary aı saıyn lıfttiń sapaly tehnıkalyq qyzmet kórsetýine mindetti lıft kompanııalaryna aqy tólep otyr. Qyzmet kórsetetin kompanııalardyń óz mindetterin atqarýdaǵy salǵyrttyǵy qaıǵyly oqıǵalar men apatty jaǵdaılardyń ósýine ákep soǵady», - dedi Shakır Hahazov.
Halyq qalaýlysy lıft jabdyqtarynyń paıdalanýǵa berilýimen, montajymen jáne onyń jaǵdaıyna saraptama jasaýmen jeke kompanııalardyń ǵana aınalysatynyn aıtty. Lıtsenzııalaýdyń joqtyǵynan naryqta olardyń sany artyp keledi.
«Olardyń arasynda qajetti materıaldyq-tehnıkalyq bazasy joq, tájirıbesi men bilikti mamandary joq bir kúndik kompanııalar da az emes. Kóp jaǵdaıda olar óz qyzmetteriniń arzan baǵasymen páter ıeleriniń kooperatıvin satyp alady.Olar halyqtyń qaýipsizdigimen tikeleı baılanysty jumystardy atqarady jáne mundaı kompanııalardyń qyzmeti azamattardyń kúmánin týdyrady. Qazirgi ýaqytta Astana men ózge qalalarda lıft kompanııalarynyń qyzmetine baqylaý júrgizetin qurylym joq. Barlyq respýblıka boıynsha lıft qoldanysy men qaýipsizdigi jaǵdaıyna tolyq kólemdi muqııat tekserý júrgizý qajet», - dep basa aıtty Shakır Hahazov.