Depýtattar mınıstrdi qyzmetinen bosata alady - Jaqsybekov

ASTANA. QazAqparat - Bılik tarmaqtary arasynda ókilettikterdi qaıta bólgennen keıin Parlamenttiń jańa quramy saılansa, Úkimettiń quramy da jańadan jasaqtalady. Búgin Parlament palatalarynyń birlesken otyrysynda QR Prezıdent Ákimshiliginiń basshysy Ádilbek Jaqsybekov osy bir mańyzdy ózgeris jaıynda aıtyp berdi, dep habarlaıdy QazAqparat tilshisi.

«Úkimettiń quramyn jasaqtaý barysynda Premer-Mınıstr Memleket basshysynyń qaraýyna úmitkerlerdiń tizimin usynady. Biraq aldymen Parlamentpen keńesip alady. Al syrtqy ister jáne qorǵanys mınıstrlerin Prezıdenttiń ózi taǵaıyndaıdy. Konstıtýtsııalyq reformalar aıasynda mańyzdy bir norma bar. Oǵan sáıkes, Úkimet óz ókilettilikterin jańadan saılanǵan Prezıdenttiń aldynda emes, jańadan saılanǵan Parlamenttiń aldynda tapsyrady», - deıdi Jaqsybekov.

Onyń aıtýynsha, Parlamenttiń árbir palatasy belgili bir mınıstrdiń jumysyna qanaǵattanbasa, Prezıdenttiń atyna úndeý joldaý arqyly ony jumystan shyǵara alady. Ondaıda Memleket basshysy mınıstrdi qyzmetinen bosatady.

Aıta keteıik, qazirgi ózgerister Parlamenttiń rólin kúsheıtýdi kózdeıdi. Májilis músheleri Úkimettiń quramyn jasaqtaýǵa atsalysyp, mınıstrler kabınetiniń jumysyn baqylaı alady.