Depýtattar mınıstrdi qaı kezde jumystan shyǵara alady - konstıtýtsııalyq ózgerister

ASTANA. QazAqparat - Parlament Májilisiniń depýtaty Baqytjan Ábdiraıym «mınıstr zańdy oryndamasa, depýtattar Prezıdentke úndeý joldaý arqyly ony jumystan bosata alady» degen konstıtýtsııalyq ózgeriske qatysty túsinikteme berdi, dep habarlaıdy QazAqparat tilshisi.

«Endi, «zańdy oryndaý» degenimiz, ol - memlekettik baǵdarlamalardy oryndaý mindeti. Búginde Úkimettiń moınynda biraz memlekettik baǵdarlamalar bar ǵoı. Sol baǵdarlamalarǵa qatysty Parlamentke árbir mınıstrdi jeke-jeke shaqyryp, esep alý quqyǵyn berý usynylyp otyr. Memlekettik baǵdarlama bolǵan soń onyń ishinde naqty ındıkatorlar kórsetilgen. Sol ındıkatorlar oryndalmasa, depýtattar mınıstrdi jumystan bosatý týraly usynys jasaı alady», - dedi Ábdiraıym QazAqparat tilshisine bergen suxbatynda.

Aıta keteıik, otyrys barysynda QR Prezıdenti Ákimshiliginiń basshysy Ádilbek Jaqsybekov jańa konstıtýtsııalyq ózgerister boıynsha depýtattardyń mınıstrlerdi taǵaıyndaý jáne jumystan shyǵarý jumysyna qatysa alatyndyǵyn jetkizdi.

Depýtattar bolsa, syrtqy ister men qorǵanys mınıstrimen birge ishki ister mınıstrin taǵaıyndaýdy da Prezıdenttiń quzyretinde qaldyrý qajet dep sanaıdy.